Á meðan laufin sofa liggja spaðarnir andvaka

2011-09-29T22:42:00.001Z

Orðrétt
"Ármenningar hafa ráðið til sín "niggara" mikinn og stórann í orðsins fyllstu merkingu, kappinn er hvorki meira né minna en 2,14 á hæð og á
annað hundrað kg."

- RÖP í fréttinni "Svartur og 2,14 á hæð" í Tímanum 21. október 1980.

2011-09-28T01:09:00.002Z

Orðrétt
"The report of my death was an exaggeration"

- Mark Twain rithöfundur í maí 1897.

2010-12-24T15:05:00.004Z

Útvarpsviðburður
Það stefnir í epíska útvarpsþætti hjá þeim félögum Birgi Olgeirssyni, a.k.a Tankurinn og Rögnvaldi Magnússyni, a.k.a Pensillinn á Lífæðinni á milli hátíðanna. Í það minnsta man síðuhaldari ekki eftir útvarpsþætti í svipinn sem hefur keyrt jafn metnaðarfullar auglýsingar. Þó er erfitt að átta sig á því af hverju síðuhaldara bregður fyrir í annari auglýsingunni en það er svo sem aukaatriði.

Auglýsing:

Auglýsing:

Passið ykkur á myrkrinu.

2010-12-24T15:04:00.001Z

Orðrétt
"Við erum í Madison Square Garden, Hliðarenda þeirra Bandaríkjamanna, mekka íþróttanna"

- Svali Björgvinsson í lýsingu á leik New York Knicks og Miami Heat á Sýn á dögunum.

2010-12-19T15:23:00.002Z

Munnmælasögur#111
Harðjaxlinn Kristján Jón Guðmundsson þjálfaði meistaraflokk UMFB í knattspyrnu um tíma á níunda áratug síðustu aldar. Einhverju sinni að vori til stóð til að funda fyrir fyrsta leik sumarsins og halda svokallaðan töflufund þar sem farið væri yfir taktík og fleira. Liðið hafði vitaskuld búningaaðstöðu og æfingaaðstöðu í íþróttahúsinu en ekki tókst að sannfæra þáverandi yfirmann íþróttamiðstöðvarinnar um nauðsyn þess að fá fundaraðstöðu. Var því ákveðið að funda í hliðarsalnum í Félagsheimilinu. Eitthvað fór þetta fyrir brjóstið á einhverjum bæjarbúum og ekki þótti við hæfi að knattspyrnuliðið væri að funda á barnum í plássinu. Þegar fundurinn átti að hefjast voru einhverjir leikmenn með áhyggjur af þessu og lýstu þeirri skoðun sinni að þetta væri ekki mjög heppilegt fyrirkomulag. Spyr þá einn leikmannnanna: "Er virkilega enginn betri staður í bænum til þess að halda töflufund heldur en pöbbinn?" Kristján hafði ekki miklar áhyggjur af þessu en var fljótur til svars. "Jaa það væri þá helst apótekið."

2010-11-20T01:32:00.000Z

Orðrétt
"Stjórnvöldum þykir ekki nóg um upplausn og deilur í þjóðfélaginu og því hafa þau ákveðið að einmitt núna þurfi að endurskoða stjórnarskrá lýðveldisins og að skynsamlegast sé að efna til kosningar til sérstaks stjórnlagaþings. Það hefur gert það að verkum, að fjöldi lukkuriddara er nú í óða önn að finna sér einhver baráttumál, einhverjar stjórnarskrárbreytingar sem alls ekki þoli bið.

Sumum hefur ekki gengið betur en svo, að þeir nefna það fyrst af öllu að breyta þurfi þeirri stjórnarskrárgrein er fjallar um samband ríkisins og kirkju. Svo furðulega vill til, að þar er einmitt sú stjórnarskrárgrein sem minnstar líkur eru á að nokkru sinni verði breytt með stjórnarskrárbreytingu, og því sú grein sem stjórnlagaþingið á minnst erindi við, og er þá mikið sagt.

Í 62. gr. stjórnarskrárinnar segir: "Hin evangeliska lúterska kirkja skal vera þjóðkirkja á Íslandi, og skal ríkisvaldið að því leyti styðja hana og vernda. Breyta má þessu með lögum." Í 2. mgr. 79. gr. segir svo, að ákveði alþingi slíka breytingu skuli hún borin undir þjóðaratkvæði.

Stjórnarskránni verður einungis breytt á alþingi, það þarf að gerast tvívegis og með alþingiskosningum á milli. Stjórnarskrárgrein verður því aldrei breytt nema meirihluti alþingismanna ákveði að efna til slíkrar breytingar. Vilji meirihluti alþingismanna gera þá breytingu, að hin evangelíska lúterska kirkja verði ekki lengur þjóðkirkja á Íslandi, verður það að sjálfsögðu gert með þeim hætti sem stjórnarskráin tiltekur, það er að segja með samþykkt alþingis sem í framhaldinu verður borin undir þjóðaratkvæði. Þessari stjórnarskrárgrein verður ekki breytt með stjórnarskrárbreytingu, nema þá að menn vilji festa þjóðkirkjuskipanina sérstaklega í sessi með því að afnema heimild alþingis til að gera á henni breytingar. En það munu þeir víst ekki vilja, sem tala hátt um að breyta 62. grein stjórnarskrárinnar. Kirkjuskipaninni verður því ekki breytt með stjórnarskrárbreytingu heldur lagabreytingu.

Þeir stjórnlagaþingframbjóðendur sem nefna breytingu á kirkjuskipan sem sitt helsta baráttumál, þeir vaða reyk. Þeir ættu fremur að bjóða sig fram til alþingis en stjórnlagaþings."

Vef-þjóðviljinn, hinn 15. nóvember 2010.

2010-11-20T01:16:00.003Z

Munnmælasögur#110
Fyrir nokkrum árum hélt fjöldinn allur af Bolvíkingum til Islandtilla í Andalúsíu á Spáni til þess að leika golf. Nokkrir traustir menn höfðu farið árlega á Tillann eins og það er kallað og smám saman vatt sá hópur utan á sig. Í ferðinni sem hér um ræðir voru margir snillingar og meðal annara voru Jón Steinar Guðmundsson frá Dröngum og Rögnvaldur Pensill Magnússon.

Á heimleiðinni brugðu Jón og Rögnvaldur sér á salernið á flugvellinum í Portúgal. Jón situr inni á Gustavsberginu en Rögnvaldur stendur við vaskana og fór með einhverjar setningar úr Fóstbræðrum á meðan hann beið eftir Jóni. Skyndilega heyrast mikil hljóð innan úr klósettbásunum og lætin voru slík að þarna hlaut að sitja einstaklingur með alvarlegar meltingartruflanir. Rögnvaldur hrópar upp yfir sig: "Jón!!!" Þar sem þeir félagar eru báðir afskaplega þroskaðir einstaklingar þá sprungu þeir gersamlega úr hlátri, Jón á básnum og Rögnvaldur við vaskinn. Eftir drjúga stund og óhemju mikinn hlátur, þá tókst Jóni loksins að stynja upp með herkjum, hálf vælandi: "Þetta er ekki ég!" Þá rann loks upp fyrir Rögnvaldi að það var alls ekki Jón sem var að misþyrma postulíninu heldur maður á næsta bás sem reyndist vera Íslendingur úr Islandtilla ferðinni. Jón og Rögnvaldur hröðuðu sér út og biðu fyrir aftan nálæga súlu og fylgdust með hver kæmi næst út af salerninu á eftir þeim.

2010-11-10T21:55:00.002Z

Orðrétt
"Nei nei, ég hef aldrei farið ofar en Playboy"

- Bragi Kristjónsson, fornbókasali í Kiljunni í kvöld, spurður um hvort hann hafi einhvern tíma verið með klámfengnar bókmenntir til sölu í búðinni.

2010-10-08T17:45:00.003Z

Fjölmiðlaathyglin
Óhætt er að segja að nýjustu tíðindin af skástrikinu hafi komist í heimspressuna. Þar sem síðuhaldari er sérlegur veislustjóri BÍ/Bolungarvíkur þá hefur honum verið bannað að tjá sig um málið opinberlega. Síðuhaldari er náttúrlega vanur mikilli fjölmiðlaathygli og hún hefur sannarlega ekki minnkað við þessi tíðindi. Meðfylgjandi myndband undirstrikar það en þá var síðuhaldari að taka sér pásu í hálfleik á U-21 árs landsleik Íslands og Skotlands í gærkvöldi.

2010-09-14T16:15:00.001Z

Orðrétt
"Suðurnes eru Dharavi Íslands, botninn á tilverunni. Þar var hermangið og þar var rokkið. Árangur nemenda í skólum er lakari en annars staðar, mælt í ótal könnunum. Atvinnuleysi meira en annars staðar. Fleiri á opinberu framfæri en annars staðar og öryrkjar eru fleiri. Þar eru kosnir bæjarstjórar, sem sjá ekki aðra leið en álver út úr sukkinu. Eru að drukkna í kostnaði við leigu á einkareknu húsnæði til opinberra þarfa. Ekki veit ég, hvers vegna latt og kraftlítið fólk býr á Suðurnesjum. Kannski vegna áratuga hermangs. En ég veit, að það hefur óraunhæfar vonir um að fá mikið fyrir litla fyrirhöfn."

- Jónas Kristjánsson, fyrrum fræðslustjóri Suðurnesumdæmis, á bloggi sínu jonas.is hinn 27. mars 2010.

2010-08-08T02:15:00.001Z

Hvað er eftirsóknarvert?
Ef það er eftirsóknarvert í sjálfu sér að heyra hvaða skoðanir tónlistarfólk hefur á orkumálum, þá myndi ég persónulega vilja heyra hvaða skoðanir alvöru spaðar eins og Gylfi Ægis og Stebbi í Lúdó hafa á orkumálunum.

2010-06-17T14:54:00.000Z

Orðrétt
"Á næsta ári munum við minnast þess að 200 ár verða liðin frá fæðingu Jóns Sigurðssonar, frá Hrafnseyri við Dýrafjörð, sem var einn helsti baráttumaður okkar Íslendinga fyrir sjálfstæði."

- Jóhanna Sigurðardóttir Forsætisráðherra í hátíðarrræðu í dag.

2010-06-15T14:28:00.001Z

Orðrétt
"Við erum því miður misjafnlega bleik eftir aldar vera í þessu landi og það er ekki við mig að sakast þó að genum mínum sé þannig komið fyrir að húðlitur minn sé með nokkrum öðrum hætti en hábleikra Íslendinga."

- Árni Páll Árnason Félagsmálaráðherra í pontu á Alþingi í dag en hann tók ekki til máls þegar notkun ljósabekkja var til umræðu í þinginu í gær.

2010-06-11T12:28:00.001Z

Orðrétt
"Hann ætti að prófa að standa nær rakvélinni"

- Svali Björgvinsson sálfræðingur um Pau Gasol í lýsingu á fjórða leik Boston Celtics og LA Lakers á Sýn í nótt.

2010-05-12T12:20:00.001Z

Orðrétt
"Seðlabankar Evrópulanda hafa í morgun hamstrað ríkisskuldabréf Grikklands og fleiri skuldsettra Evrulanda. Hlutabréf banka og fjármálafyrirtækja hækkuðu í kjölfarið. Auður var færður frá skattgreiðendum til hlutabréfaeigenda í bönkum. Okkur er sagt að það sé verið að bjarga veslings Grikklandi, Spáni og Portúgal með því að Evrópusambandið, Alþjóðagjaldeyrissjóðurinn og ýmis ríki heims taki sig nú saman og ausi fé í galtóman ríkiskassann í Aþenu. En hverjum er í raun verið að bjarga? Jú þeim sem tóku þá fáránlegu áhættu að lána yfirskuldsettum ríkissjóði Grikkja. Hvergi virðast þeir sem hafa hagað sér eins og fáráðlingar mega fara í þrot í friði fyrir "björgunaraðgerðum". Svo er þetta allt skrifað á reikning frjáls markaðar. Hve frjáls er sá markaður þar sem menn mega jafnvel ekki verða gjaldþrota?"

- Vef-þjóðviljinn hinn 10. maí 2010.

2010-05-10T17:54:00.003Z

Spá fyrir Pepsí deildina
Það hefur skapast hefð fyrir því að birta árlega spá fyrir Íslandsmótið í knattspyrnu 2010. Nokkrir lesendur hafa komið að máli við síðuhaldara og farið fram á að slíku verði framhaldið þrátt fyrir slælegar uppfærslur á þessu annars ágæta síðuhaldi.

1. Keflavík
2. FH
3. KR
4. Breiðablik
5. Fram
6. Valur
7. Grindavík
8. ÍBV
9. Stjarnan
10. Haukar
11. Fylkir
12. Selfoss

Er á leiðinni á völlinn að sjá fyrsta leik mótsins en skutla inn laufléttum rökstuðningi. Hann verður þó ekki mjög merkilegur því þessari spá er kastað fram án þess að hafa séð liðin að neinu marki í innanhússsparkinu í vetur. Það má því segja að þessi spá sé út í loftið. Spái Keflavík 1. sæti til þess að halda friðinn við samstarfsmann í bókaútgáfu. Þeir hafa þó mannskapinn í þetta ef litið er til þeirra leikmanna sem snúið hafa heim á undanförnum árum. Lítið að marka árið í fyrra þar sem Hólmar missti um helming úr en hann er náttúrlega lykilmaður. FH er liðið sem þarf að ryðja úr vegi til þess að ná titlinum enda hafa þeir nánast einokað þetta undanfarin ár og nánast óvirðing að spá þeim ekki titlinum. Eru meira spurningamerki vegna þeirra breytinga sem orðið hafa á leikmannahópnum. Nokkrir mjög reyndir menn farnir. KR hefur mannskapinn til þess að verða meistari og spilamennska liðsins seinni hluta mótsins í fyrra bendir til þess að liðið verði í baráttunni. Liðið þarf þó að sýna að það sé líf eftir Gumma Ben. Það gerðu þeir ekki síðast og Valur ekki heldur í fyrra. Liðin virðast verða háð honum í sóknarleiknum. Breiðablik er lið sem áhugavert verður að fylgjast með. Fyrsti bikarinn kominn í hús og mjög sterk kynslóð tekinn við. Eru einnig með Bolvíkinginn Gumma Kristjáns innanborðs. Fram hefur sýnt stöðugleika undir stjórn Þorvaldar. Engin sérstök ástæða til þess að ætla að það breytist nú. Eru einnig með Bolvíkinginn Jón Guðna innanborðs. Valur er stórt spurningamerki enda miklar breytingar orðið á Hlíðarenda. Þrátt fyrir slakt gengi í fyrra þá eru engu að síður margir gæða knattspyrnumenn í hópnum. Eru einnig með Bolvíkinginn Matthías Guðmundsson innanborðs. Grindavík mun verða á sömu slóðum. Geta unnið hvern sem er þegar þeir eru í stuði en skortir stöðugleika. Grétar, Scotty og Ondo verða skemmtilegir í framlínunni. ÍBV hefur fengið til sín sterka leikmenn eins og Tryggva og Finn til þess að vega upp á móti brotthvarfi Bolvíkingsins Péturs Run. Þeir eru þó alltaf spurningamerki og gætu þess vegna fengið Englendinganna aftur á síðustu stundu og yrðu þá miklu sterkari. Stjarnan kom á óvart í fyrra og eru líklega með sterkara lið en þá. Voru þó ekki burðugir í seinni umferðinni og menn eru hættir að vanmeta þá. Haukar hafa fengið nokkra mjög reynslumikla leikmenn, (þar á meðal stöðugan markmann) sem gætu gert gæfumuninn í fallbaráttunni. Fylki spái ég 11. sætinu til þess að æsa upp stjórnmálafræðing hjá Hagstofunni og vona að Óli Þórðar rambi ekki inn á þetta blogg. Eru reyndar ekki með stóran hóp og comeback Óla Stígs á vormánuðum bendir ekki til þess að útlitið sé gott. Síðuhaldari hefur ekki séð marga leikmenn Selfoss leika knattspyrnu og veit ekkert um þeirra styrk. Þessi spá er sett fram með það í huga að Gummi Ben mun líklega ekki spila.

2010-05-05T20:22:00.002Z

Ekkert nýtt undir sólinni
Síðuhaldari brá sér í kvöldmatnum út á Subway í Ártúnsbrekkunni. Þar var staddur Guðjón Kristinsson frá Dröngum. Sat hann til borðs með tveimur ungum og myndarlegum konum. Í ótryggum heimi er gott til þess að vita að sumt breytist aldrei.

2010-05-04T12:39:00.003Z

Orðrétt
"Sýningunni var vel tekið og í lokin risu menn úr sætum og klöppuðu. Það er að verða lenska hér á leiksýningum og tónleikum að salurinn er að standa upp í tíma og ótíma, eins þótt engin stórafrek hafi verið unnin. Kannski er fólk svona þakklátt fyrir að hafa ekki þurft að sitja undir leiðindum og bulli, eins og svo oft hefur verið í íslensku leikhúsi á síðari árum. En þetta er samt ekki rétt. Hvað eigum við þá að gera þegar leikhúsinu tekst að gera eitthvað virkilega gott - sem við hljótum að vona að einhvern tímann verði? Hoppa upp á stólbök og sætisarma eða upp á sviðið?"

- Jón Viðar Jónsson leiklistargagnrýnandi DV í umfjöllun um Íslandsklukkuna hinn 26. apríl 2010.

2010-05-04T01:11:00.004Z

Tvær forsíður Daily Star?
Eiður Smári Guðjohnsen prýðir forsíðu slúðurblaðsins Daily Star í dag. Systurblaðið heima á Íslandi sem feðgarnir ritstýra með sama myndarbrag fjallar um málið á heimasíðu sinni í kvöld. Ekkert óeðliegt við að íslenskur fjölmiðill fjalli um það þegar Íslendingur ratar á forsíðu erlends blaðs. Eitt vakti þó athygli mína. Ég get ekki séð að það sé sama forsíðan sem birt er á heimasíðu Daily Star og sú sem dv.is vísar í með sinni frétt. Textinn neðst á síðunni er alla vega ekki sá sami. Dæmi hver fyrir sig: Daily Star útgáfan. Útgáfan sem DV birtir.

2010-04-28T12:10:00.003Z

Lýðræðisást íslenskra blaðamanna
Á morgun fer fram aðalfundur Blaðamannafélags Íslands. Tveir aðilar bjóða sig fram til formennsku og sjálfsagt slatti af mishæfu fólki sem gefur kost á sér til stjórnarsetu. Síðuhaldari er limur í félaginu en getur ekki greitt atkvæði þar sem hann verður við störf í Keflavík, sem BLAÐAMAÐUR. Stjórn Blaðamannafélagsins, eða meirihluti, felldi tillögu um að félagsmenn geti greitt atkvæði utan kjörfundar sem er vægast sagt sérkennilegt þar sem félagsmenn vinna vaktavinnu. Svona er nú lýðræðisástin í Blaðamannafélaginu. Næst þegar lesendur sjá Þóru Kristínu Ásgeirsdóttur, eða aðra blaðamenn, mæta sem álitsgjafa í sjónvarps- og útvarpsþætti til að tjá sig um lýðræði, þá er ykkur óhætt að æla.

2010-04-26T13:29:00.001Z

Orðrétt
"Hann rífur þá úr buxunum - hann hreinlega háttar þá!"

- Svali Björgvinsson sálfræðingur um Hlyn Bæringsson í lýsingu á leik Keflavíkur og Snæfells á Sýn.

2010-04-22T23:33:00.000Z

Gagg
Síðuhaldari tók sér far með rútubifreið frá Leifsstöð í vikunni. Fámennt og kyrlátt var um borð í rútunni þegar síðuhaldari fékk sér sæti og sá hann fram á náðuga ferð í bæinn, sem yrði kærkomið eftir langt og strembið ferðalag heim. Skjótt skipast hins vegar veður í lofti þegar klappstýrugelgjur eru annars vegar. Vippaði sér um borð í rútuna hópur af unglingstelpum sem voru merktar Finnlandi í bak og fyrir: Team Finland, cheerleading team! Lógóið á búningunum virtist vera blanda af klappstýrutöktum og loftfimleikum. Á örskottstundu var eins og maður væri staddur í fuglabjargi. Líklega hefur síðuhaldari aldrei verið jafn ánægður með að eiga apparat sem kallað er Ipod eins og á þessari stundu.

2010-03-27T01:55:00.002Z

Orðrétt
"Þetta er dæmigert fyrir tómlæti Íslendinga í garð Kim Kardashian. Þeir láta upp til hópa eins og hún sé ekki til."

- Orri Páll Ormarsson stjörnublaðamaður Morgunblaðsins í Ljósvakanum í Morgunblaðinu þriðjudaginn 23. mars 2010.

2010-03-22T00:45:00.002Z

Munnmælasögur#109
Þórður Gunnarsson, rannsóknarblaðamaður á Morgunblaðinu, kom að máli við síðuhaldara og heimtaði að hér yrði sögð ný munnmælasaga.

Í Munnmælasögu#87 var þess getið að Vestfirskir Gleðipinnar voru rændir í einum verslunarmannahelgar leiðangri sínum fyrir margt löngu. Þeir voru þá staddir í Atlavík og óprúttnir einstaklingar brutust inn í tjaldbúðir þeirra og stálu flestu steini léttara. Komust þjófarnir vissulega í feitt því Gleðipinnarnir höfðu ýmislegt misnauðsynlegt með sér í slíkar ferðir. Morguninn eftir reyndu Gleðipinnarnir að sleikja sárin þegar þeir áttuðu sig á því höggi sem þeir höfðu orðið fyrir. Undruðust menn mjög að enginn þeirra skyldi vakna við allan umganginn sem verknaðinum hlýtur að hafa fylgt. Heyrðist þá Benni Óskars umla: "Mér fannst ég rumska eitthvað í nótt og heyrðist einhver segja: Hér er ekkert meira að hafa"!!!

2010-03-22T00:43:00.001Z

Big Ron#4
"Hann getur kastað lengra en ég get farið í frí"

- Big Ron Atkinsson um Rory Delap leikmann Stoke í sjónvarpslýsingu fyrir nokkrum árum.

2010-03-21T23:13:00.002Z

Hinir vammlausu
DV hefur undanförnum vikum boðið upp á tvö áberandi viðtöl við þekkta athafnamenn. Hið fyrra við Jóhannes Jónsson og hið síðara við Pálma Haraldsson. Í svipinn man ég ekki eftir viðtali sem hefur verið pantað með jafn áberandi hætti og viðtalið við Jóhannes. Alla vega ekki í frjálsum fjölmiðli. Ekki fór á milli mála að það átti að gera manninn alþýðlegan. Svo alþýðlegan reyndar að það mátti ekki einu sinni kalla hann Jóhannes Jónsson eða Jóhannes í Bónus á forsíðu blaðsins. Þettu eru jú þau nöfn sem iðulega hafa verið notuð um þennan mann í fjölmiðlum. Nei nú er hann skyndilega orðinn Jói í Bónus eins og stóð á forsíðu blaðsins. Til þess að hnykkja örugglega á því hvað þessi alþýðlegi maður er mannlegur þá var birt mynd af honum með barnabörnunum yfir hálfa síðu.

Síðara viðtalið virtist ekki vera pantað, alla vega var það ekki eins áberandi og í fyrra tilfellinu. Það var ekki heldur eins og slepjulegt og frekar til þess fallið að selja blaðið sem gerir jú út á lausasölu. Það sem vakti mesta athygli síðuhaldara var einfaldlega málflutningur viðmælandans, Pálma Haraldssonar. Hann sagði í raun í viðtalinu að hann væri snarklikkaður, og ef laganna verðir væru ekki að vakta hann dag og nótt þá væri hann líklegur til þess að brjóta lögin. Það er alla vega ekki hægt að skilja málflutning hans öðruvísi, þegar hann útskýrir framferði sitt og viðskiptafélaga sinna. Hann var annars vegar bara þáttakandi í leiknum og hins vegar áttu opinberir aðilar að stoppa hann. Það er út af fyrir sig stórkostleg hugmyndafræði að ætlast til þess að aðrir stoppi mann áður en maður framkvæmir eitthvað ósiðlegt eða áður en maður brýtur lögin.
Passið ykkur á myrkrinu.

2010-03-19T01:52:00.004Z

Er aldrei neitt að marka Halla Pé?
Harald Pétursson frændi minn starfar nú hjá símafyritækinu Nova. Starfaði hann áður hjá Vodafone og þar áður hjá Tal en á hverjum tíma voru öll þessi fyrirtæki náttúrlega þau langbestu í þeim bransa að hans sögn og sparaði hann síst yfirlýsingarnar. Halli sagði gjarnan að bestu verðin væru hjá Tali en þegar ég fór að rifja það upp við hann um daginn þá átti það bara alls ekki lengur við. Allt getur þetta nú verið svolítið ruglingslegt fyrir einfaldar sálir eins og síðuhaldara.

Vandfundinn er sá Bolvíkingur sem ekki fékk sér talnúmer þegar Halli var hjá Tali og er síðuhaldari þar ekki undanskilinn. Fékk síðuhaldari númerið 6951977 og þótti það gríðarlega fínt enda fæddur 1977. Þessu fylgir hins vegar sá galli að sá tími kemur að maður vill ekkert endilega vera að flagga fæðingarári sínu á skemmtistöðum borgarinnar. Síðuhaldari fékk því Novanúmer þegar Halli hafði félagaskipti þangað enda hélt hann yfir manni innblásnar ræður um heiðarleika og fjármálasnilli Björgólfs Thors. Halli sýndi mér þá alls kyns sniðug númer enda voru þau flest öll
laus því fyrirtækið hafði ekki hafið starfssemi með formlegum hætti. Síðuhaldari hafði nefnilega verið valinn sem tilraunadýr fyrir Nova. Líklega hefur síðuhaldari þótt tilvalinn í það hlutverk vegna yfirgripsmikillar þekkingar á farsímatækni og ástríðufulls áhuga á tækniframförum ýmis konar. Nova númerin byrja á 77 sem býður náttúrlega upp á ýmsa möguleika. Ég sagði við Halla að það væri ekki erfitt að velja númar. Ég vildi bara fá númerið 7777777 og yrði ekki til vandræða eftir það. Halli sagði að það gengi alls ekki, þó hann hefði áður sagt að ég gæti bara valið mér hvaða númer sem væri. Þetta númer væri bara alls ekki laust og myndi aldrei fara í almenna umferð. Í besta falli myndi Bjöggi nota það sjálfur. Síðuhaldari fékk því númerið 7700110 sem var næst besti kosturinn í stöðunni. Það var hins vegar jafn mikið að marka þessa ræðu eins og aðrar hjá Halla því rúmum teimur árum síðar fer maður á netið og þá er númerið 7777777 í öllum fréttum og í boði fyrir Pétur og Pál!

Passið ykkur á myrkrinu.

2010-03-11T14:27:00.001Z

Orðrétt
"Það truflar hann (Rooney) ekkert að hafa hvílt um síðustu helgi. Það truflar Gary Neville ekkert að hafa hvílt í tvö ár."

- G. Ben í banastuði á Sýn í gærkvöldi í lýsingu á leik United og Milan. Það má svo fylgja með að leikurinn fór 4:0.

2010-03-09T14:52:00.004Z

Næturblogg
Um tíma skapaðist talsverð umræða vegna næturbloggs tveggja þingmanna. Annar hefur þeirra hefur horfið af vettvangi stjórnmálanna en hinn var hækkaður í tign. Á þessum tíma voru miklar vangaveltur í gangi hvort það væri tilhlýðilegt að blogga á nóttunni og hvort sumir af hörðustu bloggurum landsins væru að skrifa undir áhrifum áfengis. Síðuhaldari rakst nú á einn bloggara sem virðast hafa sett inn færslu undir áhrifum áfengis eða í mikilli neyslu. Hann heitir Haraldur.
Passið ykkur á myrkrinu.

2010-02-24T02:06:00.004Z

Heimsmenningin
Verndari Bloggs fólksins, Halldór Magnússon var á dögunum staddur á meginlandinu og var dreginn á tónleika með þýsku hljómsveitinni Rammstein. Áður en hann hélt ytra tjáði hann síðuhaldara að hann vissi ekki mikið um músíkina en hefði heyrt vel látið af myndböndum þeirra.
Passið ykkur á myrkrinu.

2010-02-09T19:15:00.002Z

Þorrablót Bolvíkingafélagsins
Síðuhaldari hleraði í undirheimunum að trúbadorinn geðþekki Kalli Hallgríms hafi samþykkt að vera veislustjóri á Þorrablóti Bolvíkingafélagsins í Reykjavík 2011. Þeir geta nú verið misjafnir þessir veislustjórar og Kalli ætti að geta bætt upp fyrir þann sem var í ár. Hvar er hægt að nálgast miða?
Passið ykkur á myrkrinu.

2010-02-09T19:07:00.003Z

Orðrétt
„Þetta voru eins og kjarnorkusprengingar. Ég hélt að þær væru uppi í himinhvolfinu eða úti á sjó. Ég reis úr bæli mínu frá bókinni og fór út á tröppur eins og ég er vanur. Þar sem ég sá ekki neitt hringdi ég í lögregluna. Þá hafði lögreglumaðurinn heyrt þetta alla leið út á Ísafjörð en taldi að hurð hefði verið skellt fast."

- Finnbogi Hermannsson, nágranni Kristjáns og Gísla, í sínu besta formi í samtali við mbl.is hinn 7 febrúar 2009.

2010-01-30T15:03:00.003Z

Nokkrir punktar um Frakkaleikinn

- Aftur sýndu Frakkar að þeir eru í öðrum klassa en við, því miður. Stórsigur okkur á þeim á HM í Þýskalandi 2007 kemur í veg fyrir að þeir falli í þá gryfju að vanmeta Ísland. Þar var þeim pakkað saman. Þó þeir hafi verið án algers lykilmanns í dag, Bertrands Gille þá áttum við varla séns.

- Rætt og ritað hefur verið um sóknarleik Íslands sem þann besta sem sést hafi í mótinu. Frakkar höfðu greinilega kortlagt sóknarleik okkar gaumgæfilega því þeir áttu nánast alltaf svör við leikkerfunum. Það er nógu erfitt að koma góðu skoti í gegnum frönsku vörnina en ef það tekst þá bíður sá besti í bransanum, Thierry Omyer í markinu og það er nánast ósanngjarnt.

- Þetta var að mig minnir fyrsti leikurinn í keppninni þar sem íslenska liðið þarf að elta. Í öllum öðrum leikjum hefur Ísland byrjað af krafti og náð forskoti sem þeir hafa haldið lengst af leikjanna. Þetta var því eiginlega ný staða fyrir íslenska liðið að lenda undir megnið af fyrri hálfleik.

- Aron var frábær í fyrri hálfleik og Arnór í þeim seinni. Frökkum hefur líklega verið slétt sama því á sama tíma eru þeir að halda Óla, Gauja og Robba gersamlega niðri.

- Nikola Karabatic brenndi ekki af skoti hjá Frökkum og við erum að tala um leik í undanúrslitum á stórmóti. Það er með ólíkindum.

Passið ykkur á myrkrinu.

2010-01-27T15:55:00.002Z

Orðrétt
"Alexander er þjófóttasti maðurinn á Evrópumótinu. Hann má þakka fyrir að vera ekki leiddur burt í handjárnum."

- Adolf Ingi Erlingsson í beinni útsendingu á RÚV frá leik Íslendinga og Rússa á EM.

2010-01-27T15:32:00.002Z

Munnmælasögur#108
Rúmir tveir mánuðir eru síðan síðasta Munnmælasaga birtist á þessu síðuhaldi og því eins gott að gleðja lesendur með sögu af Halldóri Magnússyni, verndara Bloggs fólksins. Vegna EM í handbolta verður boðið upp á handboltasögu af HáEmm.

Dóri spilaði handbolta með Ísfirðingum á Menntaskólaárunum og þótti frambærileg skytta eftir því sem Einar Garðar frændi minn hefur sagt mér. Hávaxinn, þrekinn, örvhentur og skotfastur en af slíkum eiginleikum er sjaldnast offramboð í handbolta. Þá var leikið í þremur deildum á Íslandsmótinu. Ísfirðingar léku í þeirri neðstu enda ekki einu sinni með boðlegt íþróttahús og léku væntanlega undir merkjum ÍBÍ. Auk Einars Garðars hafa Einar Halldórs og Oddur Jóns líklega verið í liðinu og svo skilst mér að hinir og þessir Ísfirðingar hafi verið með við og við, eins og Ómar Torfa. Ég hef nú ekki heyrt mjög margar sögur frá þessum tíma fyrir utan leikinn á Selfossi þar sem Einar Garðar handarbraut einn heimamanninn, þegar Einar frumsýndi nýja varnartækni sem hann ætlaði að kenna Ísfirðingum.

Dóri þótti harður í horn að taka og féll fljótt í ónáð hjá dómarastéttinni. Fór það svo að Dóri lauk sínum handboltaferli án þess að fá nokkurn tíma að kynnast því hvernig væri að leika í síðari hálfleik. Áður en til þess kom var alltaf búið að gefa honum rautt spjald. Dóri þekkir því síðari hálfleik aðeins af afspurn. Ef menn hefðu haldið einhverja skrá yfir tölfræði í handboltanum þá væri Dóri líklega handhafi einhverja Íslandsmeta. Til dæmis var eitt sinn búið að reka hann af velli eftir um 10 mínútna leik. Væri það ekki í frásögur færandi nema fyrir þær sakir að þá fékk hann sína þriðju 2 mínútna brottvísun og þar af leiðandi rautt spjald. Af þessum 10 mínútum hefur Dóri þá setið 4 mínútur á hliðarlínunni í kælingu auk þess sem dómarar byrja yfirleitt leikina á því að veifa gula spjaldinu fyrir fyrsta brot. Halldóri hefur þá væntanlega tekist að brjóta fjórum sinnum alvarlega af sér á einhverjum 6 mínútum sem hann var inni á vellinum! Þó skal ekki útilokað að um dómaraskandal hafi verið að ræða og Dóri hafi verið hafður fyrir rangri sök.

2010-01-22T22:30:00.002Z

Orðrétt
"Ég er alveg í góðu lagi, en það var heppni að ég náði að koma mér ómeiddum út. Það hefði nú verið ljóti missirinn ef ég hefði farið."

- Snillingurinn Sophus Magnússon í viðtali á www.bb.is hinn 4. janúar 2010 eftir að kviknaði í rútu sem hann ók.

2010-01-13T23:18:00.003Z

Stunginn í Þórðarsveig
Mannslíkaminn er voldugt og merkilegt fyrirbæri sem síðuhaldari botnar lítið í. Meira að segja hin háæruverðugu vísindi skilja ekki mannslíkamann nema að litlu leyti sem sést kannski best á því að ekki er hægt að finna lækningu við fjölmörgum hættulegum sjúkdómum. Maður er því alltaf að heyra eitthvað nýtt í sambandi við mannslíkamann. Í dag skrifaði ágætur kunningi síðuhaldara, Jón Hákon Halldórsson, frétt á heimasíðu sína www.visir.is. Þar segir hann frá því að maður í Grafarholti hafi verið stunginn í Þórðarsveig. Síðuhaldari skal alveg játa að hann hefur ekki hugmynd um hvar á líkamanum Þórðarsveigur er eða hvaða hlutverki hann þjónar.

Þar sem síðuhaldari er nú takmarkaður á margan hátt þá er reyndar ekki óhugsandi að hann hafi hreinlega misskilið orðalagið. Jón Hákon gæti hafa verið að vísa til sérstakrar stungutækni; sem kallist þar af leiðandi að stinga menn í Þórðarsveig. Auðvitað er hugsanlegt að einhvern tíma hafi verið til goðsögn í undirheimum Reykjavíkur sem hafi heitið Þórður og hafi beitt sérstakri stungutækni gegn fórnarlömbum sínum. Hann hafi þá á lumskan hátt sveigt handlegginn til og stungið fórnarlömb sín í síðuna. Fyrir vikið hafi þetta stunguafbrigði verið kallað Þórðarsveigur. Áhugavert væri að vita hvor skýringin lesendum þykir sennilegri.

Passið ykkur á myrkrinu.

2010-01-04T18:42:00.001Z

Orðrétt
"Það er okkar vissa að við verðum að samþætta kynjajafnrétti í allt okkar starf, ætli okkur að takast að bregðast við loftslagsbreytingum"

- Svandís Svavarsdóttir umhverfisráðherra í Fréttablaðinu hinn 19.des. 2009.

2010-01-04T18:19:00.004Z

Áramótaannáll Vef-þjóðviljans
Sú ágæta hefð hefur skapast á þessu annars fátæklega síðuhaldi að birta nokkra mola úr Áramótaannáli Vef-þjóðviljans sem birtist á www.andriki.is á Gamlársdag.

Nostradamus ársins: Þorvaldur Gylfason sér allt fyrir, skömmu eftir að það gerist.

Flutningsmaður ársins: Atli Gíslason tók sér frí á þingi þegar Icesave-ánauðin var samþykkt. Hann sagðist standa í flutningum. Hver ætli verði dómsmálaráðherra á nýju ári?

Skrauthvörf ársins: Fréttamenn gættu þess að nefna skemmdarvarga aldrei annað en "mótmælendur".

Undantekning ársins: Stöð 2 gerði eina undantekningu og taldi að ótíndir glæpamenn og skemmdarvargar hefðu verið á ferð. Þá hafði kapall í eigu Stöðvar 2 skemmst. Áður hafði bara verið ráðist á alþingishúsið, dómkirkjuna, einkaheimili og ýmsar opinberar stofnanir, svo nú var í fyrsta sinn alvörumál á ferð.

Manngleggni ársins: Hörður Torfason hélt ræðu fyrir utan seðlabankann og sagðist vita að bankastjóranir væru allir landráðamenn. Síðar í ræðunni kom í ljós að hann vissi fullt nafn eins þeirra, hafði óljósan grun um skírnarnafn annars en vissi ekkert hver hinn þriðji væri.

Afmæli ársins: Ellert Schram varð sjötugur. Af því tilefni skrifaði Ellert Schram afmælisgrein um afmælisbarnið.

Sökudólgur ársins: Forseti bæjarstjórnar Álftaness fann sökudólg þegar bærinn komst nær í þrot. Eftirlitsnefnd með fjármálum sveitarfélaga hefði átt að grípa fyrr inn í.

Tilraunamaður ársins: Stefán Ólafsson prófessor upplýsti að hér hefði farið fram "frjálshyggjutilraun" sem mun hafa falist í stórfelldum og ábyrgðarlausum skattalækkunum.

Hvarf ársins: Ekkert sást á árinu til Stefáns Ólafssonar prófessors, sem árum saman húðskammaði stjórnvöld fyrir að hafa hækkað skattbyrði fólks með ósvífnum hætti. Árið 2006 sagði hann meira að segja að sú fullyrðing að skattar hefðu almennt verið lækkaðir á síðustu árum væru "líklega með mestu ósannindum íslenskra stjórnmála í marga áratugi."

Afskriftaröð ársins: Fréttir bárust af því að Björgólfsfeðgar hefðu óskað eftir afskrift helmings skuldar sinnar við Kaupþing. Steingrímur J. Sigfússon sagði í viðtali að þetta væri síðasta lán undir sólinni sem ætti að afskrifa. Gylfi Magnússon sagði að sér hefði svelgst á við fréttina.

Varkárni ársins: Fréttir bárust af því að eigendur Haga hefðu óskað eftir verulegum afskriftum skulda sinna við Kaupþing og að fá að halda fyrirtækjunum. Steingrímur J. Sigfússon neitaði að tjá sig um málið þar sem slíkt væri ekki við hæfi.

Fullveldissinni ársins: Árni Þór Sigurðsson alþingismaður sat í stjórn Heimssýnar frá 2007-2009.

Evrópusinni ársins: Árið 2009 varð Árni Þór Sigurðsson formaður utanríkismálanefndar alþingis og gekk strax í að koma í gegn inngöngubeiðni í Evrópusambandið.

Yfirvegun ársins: "Ég lærði það dálítið snemma í stjórnmálum að sumir sem eru mikið á yfirborðinu, þeir reyna að koma svona merkimiða á andstæðinga sína", sagði yfirvegaður leiðtogi, Steingrímur J. Sigfússon, í löngu sjónvarpsviðtali á Skjá einum í apríl.

Yfirborðsmaður ársins: "Komdu þér í stuttbuxurnar drengur" kallaði bálreiður fjármálaráðherra fram í fyrir þingmanni sem gagnrýndi yfirvofandi skattahækkanir á alþingi, daginn fyrir hið yfirvegaða viðtal við leiðtogann sem er á móti merkimiðum á fólk.

2009-12-28T17:13:00.002Z

Orðrétt
"Ég held að Alþingi hafi búið til tiltölulega góða fyrirvara í sumar og það væri bara óskandi að þeir fyrirvarar myndu halda áfram. Mér er óskiljanlegt af hverju ríkisstjórnin er að keyra Icesave eins hart áfram og þeir eru að gera. Ég sé ekki nein efnahagsleg eða pólitísk rök fyrir því að þetta sé gert á þann hátt sem gert er."

- Jón Daníelsson prófessor í hagfræði við LSE í samtali við Hlyn á mbl.is í dag.

2009-12-19T19:34:00.002Z

Verði þeim að vind og skít
Þessi furðulega ákvörðun bendir til þess að þetta eigi eftir að verða einhver sirkus á næstu árum.
Passið ykkur á myrkrinu.

2009-12-12T00:56:00.002Z

Orðrétt
"Þetta er auðvitað germsamlega óþolandi. Þetta er niðurlægjandi fyrir hina íslensku þjóð. Alveg ólíkindum að þetta hafi gerst. Hvað heyrir maður svo um skýringuna? Jú. Skýringin er sú, og hún blasir reyndar við að ekki má styggja Breta, Þjóðverja, Frakka, Austurríkismenn og allra síst Evrópusambandið út frá aðildarumsókn sem menn hugleiða mjög stíft þessa dagana."

- Atli Gíslason hæstaréttarlögmaður og alþingismaður á Alþingi hinn 18. desember 2008 en í atkvæðagreiðslu málsins á dögunum þurfti Atli að sinna bókhaldi fyrir lögfræðistofu sína.

2009-12-11T23:55:00.002Z

Eitt síðasta vígið fallið
Síðuhaldari er orðinn vanur því að sjá ýmis furðulegheit á götum sódómunnar fyrir sunnan. Fátt kemur honum á óvart í þeim efnum en þó gerðist það í gær að síðuhaldara féllust hreinlega hendur. Var síðuhaldari á leið til hins ágæta nuddara Eiríks Sverrissonar til þess að láta hann taka á brjósklosinu. Á mörgu öðru átti síðuhaldari von en að sjá antísportistann Jón Eggert Víðisson hlaupa um Þróttarahverfið eins og hann væri orðinn of seinn á framboðsfund hjá Kristjáni Möller. Ekki hefur það oft komið fyrir að Jón Eggert þessi hafi verið bendlaður við óhóflega íþróttaiðkun, nema þá helst þegar rifjuð er upp sagan af því þegar hann fór að dansa á knattspyrnuvellinum, af því þjálfarar hans Halli Pé og Nesi skipuðu honum að hreyfa sig á vellinum!

Þó svo að hlaupagikkurinn væri mjög einbeittur í þessari þrekraun sinni þá var nú ekki annað í stöðunni en að taka hann tali enda hefur Jón verið búsettur erlendis um hríð. Upp úr krafsinu kom að Jón er ekki bara hættur að reykja heldur fara Frakkar svo hryllilega í taugarnar á honum að hann hefur tekið upp á því að fara út að skokka þar ytra. Málið er orðið svo alvarlegt að Jón segist hafa tekið stefnuna á að hlaupa hálft maraþon. Maraþon vill hann þó ekki stefna á því hann óttast að það muni leiða til röð maraþonhlaupa af hans hálfu, en síðuhaldari viðurkennir fúslega að hann tapaði aðeins þræðinum þegar Jón útskýrði þær pælingar allar. Jón lagði þó aukinn þunga í þá röksemdafærslu sína þegar hann benti á að fyrsti maraþonhlauparinn hefði látist. Þá líklega fyrir aldur fram þó hann hafi ekki getið þess sérstaklega. Nú er bara að krossleggja fingurna og vona að einhver þýða verði í samskiptum Jóns og Frakkana áður en hann endar á afreksmannastyrk hjá ÍSÍ.

Passið ykkur á myrkrinu

2009-11-19T12:57:00.002Z

Orðrétt
"Merkilegt má heita að í þeirri miklu umræðu sem fram hefur farið virðist ekkert hafa verið fjallað um hversu langt heimildir löggjafans ná til að skuldbinda íslenzka ríkið (og þá um leið þjóðina) með þessum hætti - hvort ekki sé óhjákvæmilegt að setja slíkum skuldbindingum, sem allt bendir til að verði mjög þungbærar, einhver takmörk eins og leitazt var við að gera í lögum nr. 96/2009. - Og þá hlýtur stjórnarskráin að koma til skoðunar."

- Sigurður Líndal lagaprófessor á bloggi sínu í dag.

2009-11-17T17:30:00.002Z

Munnmælasögur#107
Pétur Magg, litli krúttlegi yngri bróðir verndara bloggs fólksins, hafði samband við ritstjórnina og benti á að rúmir tveir mánuðir væru liðnir frá síðustu munnmælasögu. Því verður nú kippt í liðinn en Pétur lét það fylgja með að Óli Veltir hefði sloppið vel frá munnmælasögunum og mætti alveg við því að baða sig í kastljósinu. Þá rifjaðist upp saga sem Jónas Finnboga sagði síðuhaldara.

Óli Veltir og Hilmar Georgsson, a.k.a Himmi Gogg voru um tíma að skapa verðmæti um borð í Júlíusi Geirmundssyni. Tókst með þeim ágætur vinskapur. Eitt sinn hafði Himmi ákveðið að taka sér verðskuldað frí og var stefnan sett á Kanarí. Óli, sem er jafnan liðlegur við vini og vandræðamenn, skutlaði Himma út á Keflavíkurflugvöll. Himmi hafði orð á því að réttast væri að Óli skellti sér með því hann hefði ekkert betra að gera. Óli sagðist hins vegar hafa öðrum hnöppum að hneppa og væri ekki á leiðinni til Kanarí. Ferðin út gekk að mestu leyti áfallalaust fyrir sig hjá Himma ef frá er talið að hann gleymdi GSM símanum sínum í bílnum hjá Óla. Tveimur dögum síðar er bankað á hótelherbergi Himma og fer hann til dyra. Var Himma frekar brugðið þegar hann opnaði hurðina. Þá stóð Óli á hótelganginum og rétti Himma símann: "Þú gleymdir símanum þínum."

2009-11-17T16:24:00.003Z

Orðrétt
"Las á dögunum bókina JÓNAS KRISTJÁNSSON FRJÁLS OG ÓHÁÐUR. Vægast sagt mjög sérstæð bók, enda skrifuð af skrítnum og sjálfhverfum fýr um hann sjálfan og hina óendanlegu snilld hans á öllum sviðum blaða- og hestamennsku. Í bókinni leiðir höfundurinn m.a. fram í dagsljósið blaðtækninn Jónas, sem gerði Tímann að alvöru blaði upp úr 1960, bjargaði Vísi nokkru síðar og skóp árið 1975 blað blaðanna, Dagblaðið, sem árið 1981 gleypti Vísi og úr varð DV.

Með Jónasi hefur starfað fjöldi blaðmanna, sem gert er mishátt undir höfði í bókinni. Jónas hefur sérstakt dálæti á Gunnari Smára Egilssyni - man ekki eftir betri blaðamanni á sviðum viðskipta og efnahags – mesti reikningshaus sem Jónas hefur kynnst. Þessir kostir Gunnar Smári virðast hafa verið fjarri þegar Smárinn réðst í Dagsbrúnarævintýrið og útrásina til Danmerkur, Englands og Bandaríkjanna - útrás sem engin veit hvað kostaði en reið Stöð 2 nánast að fullu fjárhagslega.
Reynir Traustason núverandi ritstjóri DV er líka í uppáhaldi hjá Jónasi - fær einkunnina kjarnakarl, eins og Sigurjón M. Egilsson. Jónasi segir þessa tvo blaðamenn hafa markað djúp spor í fjölmiðun á síðasta áratug nýliðinnar aldar.

Samkvæmt Jónasi er Reynir maður sannleikans; maður sem ekki gefst upp í andbyr - minnir Íslendinga mest á félagana Woodward og Berstein - lætur ekki bugast þó móti blási og við ógnaröfl sé að etja. Spurning hvort það meiði ekki æru Woodward og Berstein að eiga sér samsvörun í Reyni Traustasyni og því sem hann stendur fyrir í blaðamennsku hér á landi. Reynir lærði blaðamennsku af Jónasi og um þann lærdóm gildir hið fornkveðna, að sjaldan fellur eplið langt frá eikinni. Hvorki Reynir né Jónas eru menn sannleikans heldur fyrst og síðast kjaftakarlar. Bók Jónasar um hann sjálfan og þá sem honum eru þóknanlegir hefði betur heitið Jónas Kristjánsson - sjálfshólssaga blaðtæknis og kjaftakarls."

- Sigurður G. Guðjónsson lögmaður bloggar um ævisögu Jónasar Kristjánssonar hinn 14. nóvember 2009.

2009-11-09T13:03:00.002Z

Björn Hlynur
Síðuhaldari fylgdist með Hamrinum um daginn, spennuþáttum sem RÚV allra landsmanna sýndi á dögunum. RÚV rekur reyndar einnig fréttastofu sem stendur við fréttir sínar hvort sem þær eru þvæla eða ekki. En það er nú annað mál og sorglegra. Þegar síðuhaldari horfði á Hamarinn þá velti hann því fyrir sér hvað þessi Björn Hlynur Haraldsson leikari væri nú kénghuggulegur maður. Reyndar var hann alltaf í vesti af norskum skógarhöggsmanni en látum það liggja á milli hluta. Eftir að þættirnir höfðu runnið sitt skeið á enda þá hafði glöggur starfsmaður Morgunblaðsins orð á því að fyrra bragði að leikarinn Björn Hlynur og síðuhaldari væru afskaplega líkir. Nefndi hann útlit, raddblæ og hvað eina. Síðuhaldari nú orðinn ýmsu vanur þegar kemur að tvífarakenningum en hefur ekki heyrt fyrr að hann líkist þessum Birni. Hvað segja lesendur um þetta? Þeir lesendur síðuhaldsins sem fá fróun úr því að skopast að síðuhaldara hafa væntanlega skoðun á þessu.
Passið ykkur á myrkrinu

2009-11-02T20:28:00.002Z

Hinn eini sanni Einar
Einar Þór Jónsson er fimmtugur í dag. Ótrúlegt er satt. Hann lítur glettilega vel út kallinn enda hefur hann reykt frá unga aldri og forðaðist íþróttaiðkun eins og heitan eldinn framan af ævinni. Kannski að yngingarkreminn hans séu raunverulega að virka. Síðastliðið sumar vann Einar Þór sér inn nafnbótina "Hinn eini sanni Einar" á ættarmóti EG ættarveldisins. Í hópi barnabarna ömmu og afa eru 8 Einarar í þeim ættlið einum. Að þeim forspurðum var undirbúin keppni á ættarmótinu þar sem Einararnir voru látnir keppa um umrædda nafnbót og heiðurinn sem henni fylgir. Var um eins konar fjölþraut að ræða á laugardagskvöldinu. 7 Einarar kepptu um nafnbótina en sá yngsti, Einar Pé, mætti ekki til leiks og bar fyrir sig þá afsökun að Aníta væri að ala honum barn.

Keppt var í að kreista baðvog, spurningakeppni með bolvískum spurningum og söng. Til að gera langa sögu stutta sigraði Einar Þór og Einar Guðmunds varð annar. Verður Einar Þór ekki kallaður annað en Hinn eini sanni Einar hér eftir. Blogg fólksins óskar Hinum eina sanna Einari til hamingju með daginn og öll árin en hann er að heiman á afmælinu eins og sagt er í tilkynningunum. Hægt er að skutla til hans afmæliskveðjum í gegnum athugasemdakerfi síðunnar.

Passið ykkur á myrkrinu.

2009-10-15T17:27:00.001Z

Orðrétt
"Sum nöfn og sitthvað fleira get ég aldrei munað. Þannig get ég aldrei munað hvað Leonard Cohen heitir og hef ég þó reynt að ná því áratugum saman. Það er fyrir löngu orðin eins konar þráhyggja hjá mér að geta munað nafnið á honum."

Hlynur Þór Magnússon, blekbóndi á bloggi sínu hinn 10. október 2009.

2009-10-15T16:26:00.003Z

Sandornafok
Þó fáir lesi DV og dv.is þá hefur það engu að síður vakið nokkra athygli hversu kollegarnir á Morgunblaðinu eru blaðamönnum DV hugleiknir. Fréttaskýringavefurinn AMX er búinn að taka saman hversu oft Morgunblaðið og Davíð Oddsson hafa komið fyrir í fréttum DV og dv.is að undanförnum. Niðurstaðan er sláandi. Þessir miðlar hafa skrifað yfir 50 fréttir um Moggann og Dabba á einum mánuði!

2009-10-01T18:10:00.001Z

Orðrétt
"Það þyrfti að tappa af honum 60% af loftinu sem er í honum. Þá væri hann
nokkuð góður."

- Bragi Kristjónsson fornbókasali í Kiljunni á RÚV í gærkvöldi en hann virðist ekki vera ýkja hrifinn af Árna Páli Árnasyni félagsmálaráðherra.

2009-09-25T16:31:00.003Z

DV í stuði
DV hefur farið hamförum undanfarið og þá sérstaklega í afar hlutlausum fréttaflutningi sínum af samkeppnisaðila sínum en áhugi DV á Morgunblaðinu jaðrar við blæti. DV hefur þó undanfarið náð að henda inn einni og einni frétt innan um faglegu umfjöllunina um Moggann. Ein fréttin á dv.is bauð upp á fyrirsögnina: "Ótryggðir deyja frekar" sem er einhver áhugaverðasta fyrirsögn sem síðuhaldari hefur rekið augun í síðan bb.is bauð upp á: "Nýfæddum börnum fækkar á Ísafirði."

2009-09-22T00:05:00.004Z

Maggi Scheving fær samkeppni úr óvæntri átt
Þær fregnir berast nú úr villta vestrinu að Verndari Bloggs fólksins, HáEmm, sé farinn að haga sér eins og (íþrótta)álfur þar vestra. Hefur HáEmm verið mikill íþróttafrömuður á þessu ári og farið ófáar ferðirnar í stúdíóið á ókristilegum tímum. Sjálfsagt er verndarinn orðinn eins og tálgað hrífuskaft en síðuhaldari hefur reyndar ekki séð kappann í langan tíma. Gerði tilraun til þess að koma við á hornskrifstofunni í Orkubúinu í lok júní en þá var HáEmm í fríi einu sinni sem oftar. Líklega hefur hann verið búinn með alla blýantana. Ýmsir áhrifamiklir menn í þjóðfélaginu velta nú fyrir sér hvaða þýðingu þessi breytti lífstíll kunni að hafa í Skutulsfirði. Sérstaklega munu margir meðlimir Vestfirskra Gleðipinna hafa áhyggjur af þróun mála en í þeim fróma félagsskap, hefur íþróttaiðkun í óhófi, verið litin hornauga hingað til. Nýjasta uppátæki HáEmm virðist svo hafa verið kornið sem fyllti mælinn en hann tók þá ákvörðun fyrir skemmstu, að hjóla til Bolungarvíkur og til baka. Tveir kunnir Gleðipinnar sáu nýverið ástæðu til þess að rjúfa þögnina og hafa tjáð sig um málið opinberlega og áhyggjur þeirra leyna sér ekki:

"Þetta var það síðasta sem þjóðin þurfti á að halda, eins og allt er nú orðið," sagði Addi Árna Búbba og Indriði Hákarl Óskarsson bætti um betur: "Allar grunnstoðir þessa þjóðfélags hafa nú hrunið. Djöfulsins!!"

2009-09-16T16:53:00.003Z

Orðrétt
"Með allar kistur fullar af evrum frá Bæjaralandi þurfti að styrkja liðið. Rússneski landsliðsmaðurinn Pavel Pogrebnyak var keyptur frá Zenith í Pétursborg fyrir brot af Gomezar-gullinu. Pogrebnyak er stór og mikill framherji og sagt að með hann í liðinu muni Stuttgart ekki sakna gulldrengsins Gomez mikið. Eins og sjá má á myndinni þá eiga hárgelssalar og brúnku- og strípugerðarmenn Stuttgart ekki von á miklum bissness við komu Pogrebnyak. No-nonsense leikmaður!"

- Smári Karlsson í pistli hinn 9. september 2009 á nýrri snilldarsíðu um þýsku bundesliguna.

2009-09-16T16:44:00.003Z

Einmitt það já
Tilþrif Rogers Federer tenniskappa frá Sviss fara nú sem eldur í sinu um alnetið og engin furða. Síðuhaldari hefur nú frekar takmarkaða innsýn í hvað er erfitt í framkvæmd og hvað ekki í þessari íþrótt. Hins vegar er nóg að skoða stærð mótsins, mikilvægi leiksins og tímapunktinn í viðureigninni til þess að átta sig á að þetta er meiriháttar moment í íþróttasögunni. Ég held samt að ég hafi einhvern tíma séð Brodda Kris gera eitthvað svipað í badmintonleik! Þeim ágæta manni hefur stundum verið líkt við Orra Örn Árnason eftirlitsmann.

2009-09-09T20:30:00.001Z

Orðrétt
"Annars er óskandi að ekkert áríðandi kalli á Steingrím þessa daga þegar hann verður í göngum í heimabyggð sinni. Þar er nefnilega svo lélegt símasamband, eins og kom í ljós þegar frumvarp til eftirlaunalaga var lagt fram á sínum tíma. Þá náðist ekki í Steingrím dögum saman og fjölmiðlar létu sér nægja þá skýringu að hann væri fyrir norðan. Enn hafa þeir ekki sýnt því neinn áhuga hvað Steingrímur sjálfur bar úr býtum með samþykkt "eftirlaunafrumvarpsins", en sem leiðtogi stjórnarandstöðuflokks fékk hann rúmlega 15 milljónir króna aukalega í laun, vegna samþykktar frumvarpsins, þann tíma sem hann var formaður vinstrigrænna utan ríkisstjórnar."

- Vef-þjóðviljinn hinn 3. september 2009.

2009-09-04T22:28:00.002Z

Munnmælasögur#106
Maður er nefndur Sindri Sverrisson og hefur verið blaðamaður á íþróttadeild Morgunblaðsins undanfarin tvö sumur. Kannski maður er kenndur öllu heldur. Sindri hefur undanfarin ár lagt leið sína í Herjólfsdal fyrstu helgina í ágúst og hefur þar lent ýmsum ævintýrum og ekki síður skakkaföllum. Í sumar var Sindri fremur seint á ferðinni í undirbúningi sínum og lýsti áhyggjum sínum af því hve erfitt gæti orðið að fá flugfar til Eyja. Þegar Sindri fór loks á stúfana hljóp heldur betur á snærið hjá kappanum. Lýsti hann því hróðugur á íþróttadeildinni hvernig hann hefði bókað sig í ódýrustu sæti á norðurhveli jarða, til og frá Vestmannaeyjum með Flugfélagi Íslands. Fengu allir að heyra hvers lags snilldar kaup Sindri hefði gert, hvort sem þeir eru frá Akranesi eða Gjögri. Síðar rann upp sá dagur er Sindri skyldi halda til Vestmannaeyja. Var það á föstudagskvöldi fyrir frídag verslunarmanna. Þurftu þá síðuhaldari og Sigurður Elvar að standa vaktina í Hádegismóum enda miklir stúkumenn, ólíkt öðrum starfsmönnum deildarinnar.

Flugfélagið dró nú ekki beinlínis út rauða dregilinn þegar Sindri mætti á Reykjavíkurflugvöll. Var manninum einfaldlega ekki hleypt um borð í vélina þar sem hann átti ekki pantað far. Eftir nokkur heilabrot komst Sindri að því að hann hafði pantað far frá Vestmannaeyjum á föstudeginum og til Vestmannaeyja á frídegi verslunarmanna!!! Ekki er beinlínis slegist um þau sæti og þar með komin skýringin á því hversu auðveldlega þessi pöntun gekk fyrir sig hjá kappanum. Víðir Sigurðsson er nú að athuga hvort hægt sé að gefa 3 M fyrir slíka frammistöðu en Sindri var í það minnsta leikmaður ágústmánaðar hjá Morgunblaðinu. Þess má til gamans geta að Sindri er verkfræðingur.

2009-09-02T15:33:00.002Z

Orðrétt
"Menn eins og ég eru málið. Gallabuxur og bolur, auk einstaka skyrtu, voru og eru minn einkennisbúningur. Ég ek enn á 11 ára gömlum Nissan sem varla kemst upp Ártúnsbrekku. Ég er alveg laus við six-pack og er loðinn eins og villisvín (sem þýðir að hárin á líkamanum eru yfir meðallagi en ekki um of, annars væri ég loðin eins og api). Ég er svolítið fölur en útitekinn og hárið er tekið að þynnast. Og Excel er djöfullinn sjálfur í mínum augum. Ég er því kyntákn Nýja Íslands."

- Magnús Geir Eyjólfsson stjórnmálafræðingur í pistli á Pressunni þann 25. ágúst 2009.

2009-09-02T15:30:00.002Z

Stuð
Við skulum bara leyfa þessum myndum að njóta sín eins og gjarnan er sagt í sjónvarpi.

2009-09-02T15:22:00.003Z

Orðrétt
"Beita á verðpólitík sem neyslustýringu með mun markvissari hætti en gert hefur verið hingað til. Þá er mikilvægt að auka alla fræðslu um hvaða neysluvörur eru heilnæmastar."

- Ögmundur Jónasson heilbrigðisráðherra í samtali við Morgunblaðið í gær eftir að hafa lagt vörugjöld á matvæli og vill stýra því sem kjósendur láta ofan í sig."

2009-08-24T10:56:00.005Z

EM í Finnlandi
EM í Finnlandi byrjar í dag og Katrín Ómarsdóttir frænka mín er í byrjunarliðinu gegn Frökkum. Síðuhaldari var boðaður í útvarpsþáttinn fótbolti.net á X-inu 97,7 síðastliðinn laugardag. Ræddi þar um möguleika Íslands á EM ásamt Frey Alexanderssyni fyrrum samherja Jóns skyttu hjá Leikni.

2009-08-13T01:11:00.001Z

Orðrétt
"Full ástæða er til þess að mínu mati að vara við því að of geyst sé farið í erlendum lántökum með breytilegum vöxtum af því að vextir séu nú svo lágir. Allt bendir til þess að þeir muni hækka þegar fram líða stundir og muni þá vaxtabyrði lánanna aukast að sama skapi. Við þetta getur bæst gengisáhætta, sérstaklega hjá þeim fyrirtækjum sem ekki hafa tekjur í erlendum myntum."

- Þáverandi forsætisráðherra, Davíð Oddsson, á Alþingi 10. mars 2004.

2009-08-09T19:47:00.004Z

Pistill á Víkaranum
Síðuhaldari hefur annað slagið leyft lesendum vikara.is að fá ókeypis innsýn inn í hugarheim sinn með afar gáfulegum pistlaskrifum í dagskrárliðnum Hugrenningar úr Hólshreppi. Einn slíkur pistill birtist á síðunni í dag. Síðuhaldari gerði nú undantekningu og minntist ekkert á verndara Bloggs fólksins, HáEmm, en úr því verður þá vonandi bætt síðar. Ilmandi fínar tvíbökur þar á ferðinni.

2009-08-06T11:52:00.001Z

Orðrétt
"Fréttastofur sögðu frá því í gærkvöldi að stjórnvöld í Norður-Kóreu hefðu eftir viðræður við Bill Clinton fallist á að láta lausar tvær bandarískar blaðakonur sem dæmdar hefðu verið í fangelsi. Væru þær nú flognar heim með Bill. Þetta er misskilningur. Stjórnvöld í Norður-Kóreu féllust aldrei á lausn þeirra. Staðreyndin er einfaldlega sú, að segulmagn Clintons á vestrænar fjölmiðlakonur reyndist meira en norðurkóreskir rimlar þoldu. Hann einfaldlega sogaði þær út og fór."

- Vef-þjóðviljinn 5. ágúst 2009.

2009-08-06T11:41:00.003Z

Ró og spekt í Grafarvoginum
Hafliði Breiðfjörð er með heimasíðu sem hann er mjög duglegur að uppfæra og kallar Fótbolti.net. Hafliði náði á dögunum afskaplega skemmtilegum myndum frá nágrannaslag Breiðabliks og HK í bikarkeppni KSÍ þar sem stuðningsmenn liðanna reyndu með sér í alls kyns fangbrögðum. Þar sést Ómar Stefánsson til dæmis hangandi aftan í einni fótboltabullunni og Litli Valþórsson stórleikari ber hönd fyrir höfuð sér á miðri mynd, skelfingu lostinn. Í gærkvöldi fór á ég leik Fjölnis og Þróttar. Þegar ég sá gæslumennina þar þá áttaði ég mig á því að slíkar óeirðir myndu aldrei brjótast út á heimaleik hjá Fjölni. Þar er Gestur Arnarsson í gæslunni og fylgdi dómaratríónu af velli í gærkvöldi. Ef áhorfendur ætla að vera ólæti á hans vakt þá held ég að það verði nú ekkert hér um bil.

2009-07-18T01:39:00.002Z

Orðrétt
"Svandís Svavarsdóttir gerði grein fyrir atkvæði sínu í gær og fór með langa þulu um að það væri "sannfæring" sín að Evrópusambandið hefði ótal og síversnandi galla, og virtist henni þykja það sem hið allra versta bandalag. Romsunni lauk á því að hún greiddi því atkvæði að alþingi Íslendinga tilkynnti um heim allan að það óskaði eftir því að Ísland gengi í þetta bandalag. Einhvern tíma kemur að því að menn skilja, að samþykkt alþingis í gær er nákvæmlega það. Yfirlýsing um að alþingi Íslands óski eftir því að Ísland renni inn í Evrópusambandið. Það er ekkert til sem heitir að "sækja um til að sjá hvað er í boði".

Ríkisútvarpið sagði stolt frá því í gærkvöldi að fjölmiðlar víða um heim hefðu greint frá því að Ísland hefði sent inngöngubeiðni í Evrópusambandið. Ríkisútvarpið tók ekki fram, hversu margir fjölmiðlanna hefðu orðað það svo að Ísland hefði ákveðið að fara í könnunarviðræður, bara til að sjá hvað væri í boði, en hefði í raun enga ákvörðun tekið um inngöngu.

Enda er það einungis í íslenskum fjölmiðlum og þingræðum vinstrigrænna sem menn láta eins og slíkar "umsóknir" séu til.

Af sextán þingmönnum Sjálfstæðisflokksins voru aðeins tveir sem í gær stóðu ekki með fullvalda og sjálfstæðu Íslandi. Það var kominn tími til að loksins færi eitthvað 14-2 fyrir Íslandi."

- Vef-þjóðviljinn föstudaginn 17. júlí 2009.

2009-07-17T10:42:00.002Z

Munnmælasögur#105
Knattspyrnufélag Morgunblaðsins, KFM hefur verið til um langa hríð. Hafa starfsmenn og fyrrum starfsmenn blaðsins leikið innanhússknattspyrnu á veturna og jafnvel spriklað utandyra í rigningunni í Reykjavík á sumrin. Í gegnum tíðina hafa margir áhugaverðir persónuleikar komið við sögu hjá KFM. Einn þeirra er Hjálmar Jónsson framkvæmdarstjóri Blaðamannafélagsins til margra ára. Eru menn oft á tíðum kappsamir í þessum tímum, sem lengst af hafa verið í Framheimilinu í Safamýri undir öruggu eftirliti Jóhönnu baðvarðar. Fer þetta að mestu fram eftir hefðbundnum leiðum, þ.e.a.s að menn reyna að smala saman 8-10 manns og skipta í tvö lið.

Síðastliðinn vetur gerðist það að Hjálmar var að leika knattspyrnu með KFM í hádeginu á þriðjudegi og var lið hans yfir í leiknum þegar skammt var eftir, og fór svo að lið Hjálmars var að innbyrða nauman sigur þegar tímanum átti að vera lokið. Mennirnir sem leigt höfðu tímann á eftir tíma KMF voru hins vegar ekki mættir. Þegar þannig ber undir er samkomulag um að halda leik áfram þar til næsti tími byrjar. Liðu einhverjar mínútur þar til næsti tími gat byrjað en þá mættu mennirnir til leiks. Á þessum mínútum höfðu þeir leiðinlegu atburðir átt sér stað að lið Hjálmars hafði misst forystu sína og lent undir í leiknum. Var lið hans undir þegar mennirnir í tímanum á eftir mættu í salinn og því tapaðist leikurinn hjá Hjálmari sem vitanlega féll þetta þungt. Mennina í tímanum á eftir þekkti Hjálmar ekki nokkurn skapaðan hlut og hafði aldrei hitt þá fyrr á lífsleiðinni. Þegar Hjálmar er að ganga af velli þungum skrefum vindur hann sér snögglega að þessum mönnum sem voru að gera sig klára og hreytir í þá: "Af hverju í andskotanum getið þið ekki mætt á réttum tíma?" Við svo búið gekk Hjálmar til búningsklefa en skildi mennina eftir með þessa áleitnu spurningu.

2009-07-14T12:09:00.003Z

Orðrétt
"Dagurinn hjá þeim byrjar kl.06 sem er töluvert nýmæli fyrir mig"

- Bjarni Pétur Jónsson golfvallarstarfsmaður í hjartnæmu viðtali við Golf á Íslandi.

2009-07-10T14:25:00.005Z

Pistlahöfundur Íslands
Síðuhaldari hefur í gegnum tíðina fylgst grannt með pistlum Kristins R. Ólafssonar í útvarpinu og hefur stöku sinnum bent lesendum sínum á bestu bitana. Fyrir nokkrum misserum sá RÚV loks sóma sinn í því að hafa pistla hans aðgengilega á netinu þannig að maður getur flett þeim upp og hlustað ef maður missir úr, sem auðvitað gerist iðulega þegar ekkert útvarp er í verðlaunabifreiðum. Vill síðuhaldari í auðmýkt sinni benda á snilldina sem felst í tveimur nýlegum pistlum sem heita "Kaká í Real Madrid" annars vegar og "Berlusconi og myndirnar í El País" hins vegar. Auðvitað eru margir fleiri úrvalspistlar sem þarna er að finna og því vissara að HLUSTA á þá alla. Ég legg áherslu á HLUSTA því einnig er hægt að lesa pistlana en það er bara engan veginn sama upplifunin ef rödd meistarans vantar.

Hér er rétt að bæta því við að Kristinn R. er búinn að gefa Cristiano Ronaldo íslenskt nafn eins og hann hefur iðulega við stjörnur spænska boltans. Ronaldo gengur nú einfaldlega undir nafninu Kristinn R. eða Kristinn Rögnvaldur í pistlunum!!!

2009-06-30T15:36:00.001Z

Orðrétt
"Evrópusambandið hefur stillt Íslendingum upp við hlaupendann í rússneskri rúllettu með þeirri nýjung að kúlan er sjö ár á leiðinni eftir að hleypt verður af. Sambandið hefur löngum þótt svifaseint. En það er aðeins Alþingi Íslendinga sem getur tekið í gikkinn. Samfylkingin er búin að afskrifa Ísland og þingmenn hennar munu ekki hika við það. Athyglin beinist því að nokkrum þingmönnum vinstri grænna á næstu dögum.

Í umræðum um Icesave málin er því látlaust haldið fram að enginn vilji eiga viðskipti við „okkur“ ef ríkissjóður Íslands tekur ekki á sig þá mörg hundruð milljarða króna sem Tryggingasjóður innistæðueigenda - innistæðutryggingakerfið samkvæmt tilskipun Evrópusambandsins - getur ekki greitt. Þetta er auðvitað fjarstæða. Það hugsa engir stjórnendur einkafyrirtækja eða banka sem svo að öll íslensk fyrirtæki séu svikamyllur þótt tryggingakerfi innistæðueigenda hafi brugðist."

- Vef-þjóðviljinn í dag.

2009-06-20T22:40:00.004Z

Munnmælasögur#104
Fyrir nokkrum árum fór Gísli Jón Hjaltason frændi minn ásamt öðrum bolvískum kyfingum í ferð til Islantilla á Spáni. Var þar leikið golf í tíu daga eða svo og fór Gísli á kostum innan golvallarins sem utan. Hér verður síðar bætt við sögum úr ferðinni ef vel liggur á síðuhaldara. Annars vegar frá rútuferð á leið til flugvallarins og hins vegar frá salernisferð Jóns skyttu og Rögga pensils á flugvellinum.

"Gísli Jón getur nú verið dálítið utan við sig á köflum eins og hann á kyn til. Sá "eiginleiki" getur haft sínar spaugilegu hliðar eins og þessi saga sýnir glögglega. Gísli hafði ekki veitt því neina athygli að alla ferðina voru íslensku kylfingarnir að nýta sér ódýra þjónustu í klúbbhúsinu. Þar buðu Spánverjar upp á alþrif á golfkylfum fyrir einungis 2 evrur en gengi íslensku krónunnar var talsvert hagstæðara í þá daga. Síðuhaldari er ekki með nákvæmar tölur í þeim efnum en vísar á Guðbjart Flosason varðandi allar slíkar upplýsingar. Á síðasta degi ferðinnar dettur Gísla Jóni í hug, að það gæti nú verið þjóðráð að þrífa kylfurnar áður en heim væri haldið, enda búið að nota þær mikið í ferðinni. Gaf Gísli sig á tal við starfsmenn í klúbbhúsinu og innti þá eftir því hvort þær ættu græjur til að þrífa golfkylfur. Ekki gátu Spánverjarnir neitað því og tóku Gísla ljúfmannlega þegar hann falaðist eftir því hvort hann mætti nota græjurnar og þrífa kylfurnar í klúbbhúsinu.

Nokkru síðar kemur Gísli lukkulegur heim á hótel og hittir þar fyrir nokkra Bolvíkinga á hótelbarnum. (Hvar annars staðar?) Segir Gísli þeim frá þessari merkilegu uppgötvun sinni; að hægt væri að fá lánaðar græjur til þess að þrífa kylfur í klúbbhúsinu. Voru menn frekar undrandi á þessum tíðindum Gísla en áttuðu sig fljótt á því að tveggja evru kylfuþrif Spánverjana höfðu greinilega farið fram hjá Gísla. Héldu menn niðri í sér hlátrinum og spurðu Gísla hvort hann hefði kannski gefið Spánverjunum þjórfé fyrir liðlegheitin. Svaraði Gísli því játandi og spurðu menn í framhaldinu hversu mikið Gísli hefði gefið í þjórfé. Þegar Gísli sagði þeim að hann hefði gefið Spánverjunum nákvæmlega 2 evrur í þjórfé þá ætlaði þakið að rifna af hótelinu enda gátu menn ekki haldið niðri í sér hlátrinum öllu lengur."

2009-06-19T14:29:00.002Z

Orðrétt
"99 prósent af list er drasl og 99 prósent af hönnun er drasl. Hvaðan góðir hlutir koma er ekki aðalatriðið."

-Guðmundur Oddur Magnússon, a.k.a Goddur, prófessor við Listaháskólann í Fréttablaðinu í dag spurður um hvort eðlilegt væri hjá Reykjavíkurborg að útnefnda fataönnuð sem borgarlistamann.

2009-06-16T17:29:00.000Z

170 þúsund
Sápustykkið fór yfir 170 þúsund kílómetra markið í gær.

2009-06-16T00:37:00.001Z

Orðrétt
"Því velti ég stundum fyrir mér hvort Íslendingar séu áhugasamari um Evrópusambandið (ESB) en þegnar ríkja þess. Það finnst mér helst þegar saman eru bornar umræður heima á Íslandi um ESB og væntingar sem stór hluti þjóðarinnar virðist bera til þess. Á sama tíma búast þegnar aðildarríkjanna ekki við miklu af sambandinu. Og áhugaleysi þeirra á kosningum til Evrópuþingsins er algjört.

Til að mynda er Frökkum er skítsama um kosningarnar, svo notað sé vont götumál. Hér hefur samt ekki vantað auglýsingar og áróður fyrir því að kjósendur flykkist á kjörstað á sunnudag og 161 flokkur er í framboði. Fjölmiðlar hafa varið miklu rými undanfarnar vikur og lagt sitt af mörkum til að vekja áhuga á kosningunum.

Þá hefur Sarkozy forseti ítrekað hvatt þjóðina til að nýta atkvæði sitt og talað máli Evrópusamstarfsins. En allt kemur fyrir ekki, það sýna hver skoðanakönnunin af annarri undanfarnar vikur. Í könnun Opinionway fyrir fjölmiðlana Apco, La Tribune og BFM og birtist í dag segjast 64% ekki ætla á kjörstað. Hún leiðir og í ljós, að 73% Frakka og 67% Þjóðverja hafi engan áhuga á kosningunum."

- Ágúst Ásgeirsson blaðamaður bloggar frá Frakklandi 5. júní 2009.

2009-06-11T14:23:00.002Z

Farið hefur fé betra
Loksins er United að selja Ronaldo og kominn tími til. Ef einhverjir eru svo vitlausir að borga svona upphæðir fyrir einn leikmann þá á United að sjálfsögðu að taka slíku boði. Svo er reyndar spurning hvernig gengur að fá greitt frá Real en það er annað mál. Fyrir þá upphæð sem United fær fyrir Ronaldo geta þeir keypt 3-4 fjóra heimsklassaleikmenn. Liðið verður því mun sterkara auk þess sem félagið losnar við prímadonnu sem virðist ekkert sérstaklega merkilegur karakter.

2009-06-05T17:53:00.001Z

Orðrétt
"Formanni Félags íslenskra hjúkrunarkvenna var mikið niðri fyrir í gær. Fyrirtækinu Poulsen, sem selur varahluti í bifreiðar, hafði nefnilega orðið á að senda frá sér bækling sem sýndi unga konu í búningi hjúkrunarkonu, þess albúna að hlúa að bifreið. "Þarna er verið að klámgera heila fagstétt, sem er með fjögurra ára háskólanám að baki," hefur Morgunblaðið eftir Elsu B. Friðfinnsdóttur, svo alvara málsins ætti ekki að fara fram hjá neinum. Hér er ekki verið að klámgera einhverjar ómenntaðar kerlingar sem ekki eiga betra skilið og vita sennilega fæstar hvað klám er. Nei, hér er verið að klámgera stétt sem er með fjögurra ára háskólanám að baki svo nú er mælirinn fullur.

Enda kveðst formaður hjúkrunarkvenna hafa brugðist hart við. Hún hafi sent öllum félagsmönnum bréf og beðið þá um að skrifa Poulsen og mótmæla þessum auglýsingabæklingi og segist einnig hafa haft samband við Íslandspóst þar sem hún telji óeðlilegt að fyrirtækið dreifi bæklingnum.

Þetta er auðvitað stóralvarlegt mál. Það er alveg svakalegt að þeir hjá Poulsen séu að klámgera stétt með fjögurra ára háskólanám en geti ekki látið sér nægja einhverja ómenntaða stétt, eða einhverjar stelpur með hámark BA próf. Því rétt eins og fæðingarorlofið, þá eru klámfræðin hugsuð fyrir langskólagengnar konur með háar tekjur."

- Vef-þjóðviljinn í dag.

2009-06-04T14:14:00.006Z

Fær Lama lungnabólgu?
Ég yrði hissa ef Dalai Lama fengi ekki lungnabólgu eftir að hafa verið að rolast um á Íslandi í fleiri sólarhringa í þessum kufli sínum einum fata. Svo er náttúrulega milljón dollara spurningin hvort kallinn sé "commando" undir þessu svefnlaki. Annars hefði Árni Páll félagsmálaráðherra mátt sýna Lama smá tillitssemi og smyrja bara einni umferð af brúnkukremi á sig í tilefni dagsins. Dalai Lama virkaði svo hrikalega fölur í samanburði við Árna Pál í kirkjunni.

2009-06-03T16:00:00.003Z

Orðrétt
"Ef ég keyri á akrein á hámarkshraða, jafnvel 10 - 20 km umfram, ekki keyra alveg upp að bílnum mínum og horfa svo á mig eins og ég hafi átt við konuna ykkar þegar þið rífið fram úr. Þetta á sérstaklega við um þá sem aka um á sportbílum og jeppum (það verður líka enn kjánalegra þegar ég stoppa við hliðina á ykkur á næstu ljósum.)"

- Magnús Geir Eyjólfsson, stjórnmálafræðingur freistar þess að bæta umferðarmenninguna í pistli á pressan.is.

2009-05-29T14:37:00.002Z

Fagnaðarlæti í N-Kóreu
Síðuhaldari skilur ekki þennan misskilning sem er í gangi varðandi aðgerðirnar í Norður Kóreu. Menn virðast halda að kommarnir hafi verið að sýna einhverja ógnandi tilburði með þessum kjarnorkusprengjum sínum. Þetta er alger misskilningur. Þeir voru einungis að fagna því að skoðanasystkini þeirra hefðu komist til valda á Íslandi. Vandamálið var að þeir áttu ekki flugelda til að skjóta á loft, systuflokknum á Íslandi til heiðurs, vegna þess að slíkt húmbúkk er náttúrulega harðbannað í Norður Kóreu. Þeir urðu því að notast við kjarnorkusprengjurnar en það verður að taka viljann fyrir verkið hjá þeim. Menn eiga því náttúrulega ekki að venjast að upplýstar þjóðir láti byltingarsinna sprengja lýðræðislega kjörna ríkisstjórn og kjósi síðan yfir sig sósílisma í kjöldfarið. Það er því ekki nema von að mannúðartröllin í Norður Kóreu gleðjist yfir þessu og líklega halda þeir ekki vatni yfir nýja heitinu á sósíalismanum: "Norrænt velferðarþjóðfélag"!

2009-05-29T14:33:00.002Z

Orðrétt
"Hann er með blauta ullarvettlinga maðurinn"
- Svali Björgvinsson sálfræðingur um körfuboltamanninn Ben Wallace í þriðja leik Orlando og Cleveland í útsendingu á Stöð2 sport á dögunum.

2009-05-26T23:38:00.002Z

Hryllingsmyndir
Morgunblaðið hefur nú tekið þá ákvörðun að birta myndir af þeim sem rita um íþróttakappleiki með umfjölluninni í blaðinu. Þessi nýbreytni er þegar komin í gagnið á síðum blaðsins. Rétt er að biðja lesendur Morgunblaðsins afsökunar á þessu. Það er jú ástæða fyrir því að við erum ekki að vinna í sjónvarpi.

2009-05-24T15:00:00.002Z

Orðrétt
"Þeir [Færeyingar] láta menn ekki hafa heimildir til að kaupa brennivín nema þeir hafi borgað skattana sína. Þetta er alveg snilldargóð hugmynd, afar góð og holl þjóðfélagsleg hugmynd. Fyrst leggur þú þitt af mörkum til samfélagsins og síðan máttu fara og kaupa eitthvað af brennivíni fyrir afganginn ef einhver er."
- Steingrímur J. Sigfússon aðalritari VG á Alþingi hinn 2.mars 1988.

2009-05-24T14:33:00.002Z

Hugrenningar úr Hólshreppi
Nýr pistill frá síðuhaldara á vikari.is. Ágætar tvíbökur.

2009-05-22T16:51:00.002Z

Orðrétt
"Við megum ekki láta hagsmuni fárra víkja fyrir hagsmunum margra"
- Jóhanna Sigurðardóttir forsætisráðherra leggur línurnar fyrir kjörtímabilið í stefnuræðu sinni á Alþingi mánudaginn 18. maí 2009.

2009-05-19T15:36:00.001Z

Orðrétt
Tillaga ríkisstjórnarinnar um aðild að Evrópusambandinu er slíkt fádæma rugl að hún á sér engan líka. Verði hún samþykkt fær ríkisstjórnin samþykki Alþingis fyrir því að leggja inn umsókn um aðild að ESB án nokkurra skilyrða né samningsmarkmiða og það sérkennilega er að ákveðið er fyrirfram að aðildarsamningur verði gerður og um hann kosið í þjóðaratkvæðagreiðslu. Það er þó skýrt að ætlunin er að gera samning hvað sem tautar og raular. Meira að segja segir í greinargerð með tillögunni að stjórnvöld áskilji "sér rétt til að mæla með eða leggjast gegn samningnum þegar hann liggur fyrir enda eru settir margvíslegir fyrirvarar við hugsanlegan stuðning við málið". Hvers konar þvættingur er þetta? Hver á að trúa því að sá sem gerir samning og undirskrifi hann ætli sér svo ekki að mæla með því að hann verði samþykktur?
- Kristinn H. Gunnarsson fyrrverandi alþingismaður í færslunni "Fádæma rugl" á heimasíðu sinni þann 14. maí 2009.

2009-05-15T16:38:00.004Z

14.maí
14. maí er sjálfsagt ekki síður merkilegur dagur en til dæmis 15. maí eða bara einhverjir aðrir dagar. En í gær voru sex ár liðin frá því að uppáhaldsvefrit síðuhaldara; Vef-þjóðviljinn birti þessa fróðlegu og áhugaverðu færslu.

2009-05-15T12:52:00.002Z

Orðrétt
"Taktu eftir því að Úkraína og Bosnía eru einu fyrrum Júgóslavíu ríkin sem eru í úrslitunum annað kvöld"
- Páll Óskar Hjálmtýsson tónlistarmaður og landafræðingur ræðir um Eurovision söngvakeppnina í hádegisfréttum RÚV í dag.

2009-05-13T15:00:00.002Z

Munnmælasögur#103
Í mörgum bæjum er algengt að gælunöfn séu notuð í daglegu tali og þar er Bolungarvík engin undantekning. Slík nöfn festast gjarnan í minninu frekar en skírnarnöfnin sjálf. Einhverju sinni komu íslenskir ferðamenn í bæinn og fóru að spyrja heimamenn um fólk sem þau hefðu haft kunningsskap við. Þekktu þau ekki mjög náið en sögðust vilja banka upp á hjá þeim fyrst þau væru stödd í Víkinni. Spurðu þau einn Víkarann hvar þau og Jón og Guðbjörg byggju. Kannaðist hann ekki við að þau byggju í bænum. Ferðalangarnir spurðu því annan heimamann hvar Jón Guðfinnsson og Guðbjörg Hermannsdóttir byggju í bænum. Sá viðmælandi kannaðist ekki heldur við þetta fólk og var aðkomufólkið hætt að skilja í þessu. Þegar þau nefndu þetta við þriðja heimamanninn fengu þau svipuð viðbrögð. Þá létu þau fylgja með að þau héldu að gatan sem þau byggju við héti Höfðastígur. Þá kviknaði skyndilega á perunni hjá heimamanninum sem ekki hafði kannast við Jón Guðfinnsson og Guðbjörgu Hermannsdóttur. Sagði hann skyndilega: "Jaaaáaa. Evvi og Bugga. Þau búa hjá skólanum og heilsugæslustöðinni."

2009-05-12T14:38:00.002Z

Spá fyrir Pepsí-deildina
Hin árlega spá gleymdist hreinlega í þetta skiptið og kemur því þegar einni umferð er lokið af tuttugu og tveimur. Annars held ég að mín spá sé nú ekki mjög frábrugðinn þeim sem hafa farið í loftið hér og hvar.

1. FH
2. Keflavík
3. Fram
4. KR
5. Valur
6. Breiðablik
7. Grindavík
8. Fylkir
9. Fjölnir
10.ÍBV
11.Stjarnan
12.Þróttur

FH er the team to beat. Ofboðslega rútínerað lið með góðan mannskap. Búnir að spila sama kerfið í mörg ár og eru mjög stöðugir. Gleymdu heldur ekki að rækta 2. flokkinn þegar velgengnisárin hófust og fá reglulega efnilega stráka upp í meistaraflokk sem geta gengið inn í leikkerfi þeirra. Þeir eiga eftir sýna mestan stöðugleika en ég held að það hafi verið heilbrigt fyrir mótið að þeir skyldu tapa í fyrstu umferð. Þá er von um smá spennu. Keflavík hefur misst mjög sterka leikmenn á síðustu tveimur árum. Engu að síður eru mjög sterkir leikmenn í liðinu, Hólmar, Símun, Jóhann B og fleiri. Ef danski markvörðurinn og slóvenski miðvörðurinn standa fyrir sínu þá verða þeir öflugir. Eru búnir að vera við toppinn í nokkur ár. Fram sýndi stöðugleika í fyrra. Voru skynsamir og vel skipulagðir. Litlar breytingar hjá þeim þegar uppi er staðið. McShane bættist við hópinn í dag, þeirra besti maður í fyrra. Reynir Leós farinn en Kristján Hauks í staðinn. Ekki óraunhæft að þeir haldi 3. sætinu. KR gæti hæglega endað ofar en í 4. sæti en þá þarf ýmislegt að ganga upp. Spurning hvernig Hollendingarnir Rutgers og Prince koma út. Miðjan verður gríðarlega sterk með þá Jónas Guðna og Baldur Sig. Bjarni getur auk þess leyst þá af. Þessi spá breytir ekki röðun á fimm efstu liðunum frá því í fyrra. Valsmenn eru því áfram í 5. sæti. Eins og fram hefur komið er nánast búið að skipta nýju liði inn og það væri ævintýralega sterkt hjá Willum ef hann næði að pússla því almennilega saman í bara 22 leikja móti. Þetta lið er hins vegar líklegt til afreka 2010 ef rétt er haldið á spilunum. Breiðablik hefur framleitt góða leikmenn á færibandi undanfarin ár en hafa misst reynda erlenda leikmenn. Góðir knattspyrnumenn í liðinu en einn stuðningsmaður liðsins sagði við mig að þeir yrðu brothættari en margan grunar. Grindavík spjaraði sig síðasta sumar eins og síðuhaldari reiknaði með. Jankovic er mjög klókur þjálfari og nær jafnan miklu út úr sínum mannskap. Liðið þarf vissulega á því að halda að lykilmenn skili sínu til þess að þessi spá gangi eftir. Fá væntanlega fleiri stig á heimavelli en í fyrra. Fylkir er með mun yngra lið en undanfarin ár. Það vantaði alla gleði hjá þeim í fyrra og kannski er Óli Þórðar rétti maðurinn til þess að rífa þá upp en breiddin er sennilega ekki mikil í hópnum. Fjölnir kom síðuhaldara talsvert á óvart í fyrra. Ásmundur hefur gert þvílíka hluti í Grafarvoginum undanfarin ár. Hann hefur misst marga lykilmenn og telst líklega gott að halda liðinu uppi en margir reynslulitlir leikmenn í byrjunarliðinu. Síðuhaldari hefur ekki séð ÍBV spila í ár. Ef þeir ná upp Eyjastemningu og fá sinn skammt af stigum á heimavelli þá geta þeir bjargað sér. Leiðinlegt að spá einhverjum falli. Siðuhaldari veit lítið um lið Stjörnunnar og spáir þeim þess vegna falli. Spurning hvernig þetta kemur út hjá þeim að æfa og spila 50/50 á gervigrasi og grasi. Þeir byrjuðu mótið vel og geta eflaust komið á óvart. Þróttur stóð sig vel í fyrra og fékk mikið framlag frá lykilmönnum í fyrra eins og Sigmundi, Danry og Jackson. Tveir þeirra farnir og Danry færist aftar á völlinn. Þróttarar voru klókir í fyrra og nýttu líkamlega styrk mjög vel. Þetta gæti orðið mun erfiðara hjá þeim í sumar.

2009-05-11T15:36:00.003Z

Mánudagur
Er þetta ekki svolítið stemningin í dag? Reyndar er nú mikil saga á bak við umfjöllunarefnið í laginu. Þar sem Kalli Hallgríms hefur svo gaman að svona tónlistargetraunum þá er nú í lagi að spyrja; um hvað voru Boomtown Rats að yrkja? Að sjálfsögðu bannað að googla en sigurvegarinn fær ráðherrastól í sósíalistastjórninni um áramót.

2009-05-08T17:06:00.004Z

Eftirhermur
Svo virðist sem fleiri en feðgarnir Rögnvaldur pensill Magnússon og Magnús Hansson geti hermt eftir samtímamönnum sínum. Til dæmis er Guðmundur Gunnarsson, fyrrum flugfreyjumaður, alveg prýðileg eftirherma en hann vill ekki segja frá því. Hann er hræddur um að það þyki ekki nógu töff. Samkvæmt rannsóknum síðuhaldara þá hafa menn einnig spreytt sig á eftirhermulistinni utan landssteinanna. Gæðaleikarinn Kevin Spacey er greinilega nokkuð langt leiddur eins og þetta brot sýnir glögglega.

2009-05-06T15:15:00.000Z

Orðrétt
Í gær birti Morgunblaðið viðtal við Þórhall Sigurðsson leikstjóra, og eins og margir vinstrimenn hefur hann ýmsar fróðlegar hugmyndir um lífið og tilveruna. Þannig vefst það ekki fyrir Þórhalli hvers vegna Sjálfstæðisflokkurinn hafi stýrt Reykjavíkurborg áratugum saman. Það var auðvitað ekki vegna fylgis flokksins meðal borgarbúa heldur vegna samstöðuleysis vinstrimanna. Eða eins og Þórhallur fullyrðir hikstalaust við þá lesendur Morgunblaðsins sem eftir eru: "Þetta fólk hélt Sjálfstæðisflokknum við völd í Reykjavík, ásamt því að hinir flokkarnir voru sundurlyndir. Það er nefnilega staðreynd að Sjálfstæðisflokkurinn náði aldrei 50% fylgi í Reykjavík, en var samt með meirihluta, því hinir flokkarnir voru sundraðir."

Já það er "nefnilega staðreynd" fullyrðir Þórhallur blákalt í viðtalinu. Raunar er staðreyndin sú, að frá því Sjálfstæðisflokkurinn var stofnaður árið 1929 og þar til flokkurinn fékk meira en 60% atkvæða undir forystu Davíðs Oddssonar í borgarstjórnarkosningum árið 1990, gerðist það beinlínis oftar en ekki að flokkurinn fékk meira en 50% atkvæða í sveitarstjórnarkosningum í Reykjavík. Alls gerðist það níu sinnum á þessum tíma að Sjálfstæðisflokkurinn fékk meira en 50% gildra atkvæða í Reykjavík. Eða nánar tiltekið: árið 1930 fékk hann 53%, 1938 54,7%, 1950 58,8%, 1958 57,7%, 1962 52,8%, 1974 57,8%, 1982 52,5%, 1986 52,7% og 1990 60,4%. Eða eins og Þórhallur Sigurðsson fræðir lesendur Morgunblaðsins: "Það er nefnilega staðreynd að Sjálfstæðisflokkurinn náði aldrei 50% fylgi í Reykjavík."

Má Vefþjóðviljinn leggja það til, að næst þegar Morgunblaðið vill fara til Þórhalls Sigurðssonar eftir staðreyndum, að blaðið reyni þá Ladda frekar.

- Vef-þjóðviljinn hinn 4. maí 2009.

2009-04-30T16:07:00.002Z

Munnmælasögur#102
Þar sem kosningar eru nýafstaðnar þá verður hér boðið upp á skemmtilega kosningasögu. Ólafur Jens Daðason fyrrum Alþýðubandalagsmaður bjó ásamt Hrönn konu sinni í Reykjavík á valdatíma R-listans sáluga. Kom sá tími að þau skyldu ganga til sveitastjórnakosninga eins og aðrir landsmenn. Hefur þetta líklega verið árið 1998 en það er aukaatriði. Aðalatriðið er að þarna var um tvo turna að ræða í Reykjavík, annars vegar R-listann og hins vegar Sjálfstæðisflokkinn. Jenni og Hrönn höfðu rætt sín á milli um kosningarnar og ætlaði Jenni að kjósa Sjálfstæðisflokkinn en Hrönn ætlaði að greiða R-listanum atkvæði sitt.

Jenna féll þetta þungt og fannst skelfilegt til þess að hugsa að hans góða atkvæði yrði bara núllað út af atkvæði Hrannar. Þegar kjördagur rann upp voru þau snemma á ferðinni því þau höfðu ákveðið að fara út úr bænum í sumarbústað. Þegar þau eru að renna úr hlaði fer Jenni að impra á því hvort þau geti ekki alveg eins sleppt því að kjósa. Atkvæði þeirra muni núlla sig út hvort sem er og ágætt væri að koma sér strax af stað og sleppa við umferðina. Þessi uppástunga kom Hrönn mjög á óvart. Fram að þessu hafði hún aldrei vitað til þess að Jenni nýtti ekki sinn lýðræðislega rétt í kosningum. Braut hún aðeins heilann um þetta og Jenni hélt áfram að telja henni trú um að óþarfi væri fyrir þau að kjósa. Eftir smá umhugsun fannst Hrönn að hún yrði að fara á kjörstað, annað væri einfaldlega kjánalegt. Það varð úr og þau fóru og kusu. Hrönn var eins og áður segir mjög undrandi á þessum tilburðum í Jenna, þar til hún komst að því að Jenni hafði skellt sér í utankjörstaðaratkvæðagreiðslu nokkrum dögum áður án þess að láta hana vita! Jenni gerði því allt sem hann gat í þessum kosningum og hefur gert allar götur síðan.

2009-04-24T16:05:00.002Z

Orðrétt
Kolbrún Halldórsdóttir, umhverfisráðherra, sem á dögunum lýsti sig algerlega mótfallna olíuleit á drekasvæðinu svonefnda, segir orð sín hafa verið slitin úr samhengi. Hún segir ástæðuna ekki tengda olíunni, heldur miklu frekar drekunum sjálfum – og viðkvæmu vistkerfi þeirra. "Þetta er yndislegar skepnur, gáfaðar og tilfinningaríkar – en um leið afskaplega viðkvæmar fyrir öllu áreiti og skapstyggar. Það væri fásinna að raska ró þeirra með einhverjum risaborum og mæligræjum. Það endar bara með skelfingu." Kolbrún minnir á að drekarnir eru alfriðaðir og olían þeirra helsta æti. "Og svo er líka meir en nóg af olíu á íslenskum bensínstöðvum."
- Baggalútur í dag.

2009-04-22T20:00:00.004Z

Munnmælasögur#101
Þeir bræður Jakob Elías og Magnús Már Jakobssynir voru eitt sinn staddir í Hafnarfirði á kosningadegi. Líkaði þeim það hlutskipti heldur illa eins og gefur að skilja en ákváðu þó að reyna að hafa uppi á einhverju kosningastuði þegar kvölda tók. Höfðu þeir fylgt Sjálfstæðisflokknum að málum í þessum kosningum og fóru á kosningavöku hjá sjálfstæðismönnum í Hafnarfirði. Heldur fannst þeim þó rólegt yfir á þeim bænum og töldu að stuðið væri meira á kosningavöku hjá krötunum enda Hafnarfjörður þekktur kratabær. Það stóð heima. Bella og Magga líkaði þó ekkert sérstaklega við félagsskapinn og fljótlega kom á daginn þeir bræður áttu litla samleið með Hafnafjarðarkrötum. Þegar þeir fundu að þeirra skoðanir áttu ekki upp á pallborðið þá fóru bræðurnir með rökræðuna alla leið og létu heimamenn fá það óþvegið. Brugðust kratarnir reiðir við og upphófust stimpingar í kjölfarið. Bræðurnir eru nú tveggja til þriggja manna makar þegar kemur að líkamlegum burðum en engin má við margnum. Lögðu þeir því á flótta úr mannhafinu og stefndu út í nóttina. Sluppu þeir við illan leik og voru þá óhultir.

Fóru þeir ferða sinna fótgangandi og rákust fljótlega á mann í slæmu ásigkomulagi. Var hann brennivínsdauður utan í girðingu og veðrið hryssingslegt. Eins og menn vita sem kynnst hafa Bella og Magga þá eru þetta drengir góðir. Sáu þeir að við svo búið mætti ekki standa - þessi óreglumaður myndi ekki eiga góða nótt framundan við þessar aðstæður. Bræðurnir vissu að lögreglustöðin yrði á vegi þeirra á gönguleiðinni og Maggi hóf því manninn á loft og setti hann yfir axlirnar á sér. Við þessar aðfarir varð maðurinn viðskotaillur mjög og hóf að berja frá sér. Gekk hann svo langt að Maggi bjargvættur hans neyddist til þess að leggja á hann hendur. Við það slokknaði eðlilega í manninum og bræðurnir röltu af stað með manngreyið á öxlum Magga.

Sóttist þeim ferðin ágætlega þar til maðurinn rankaði við sér á nýjan leik. Greip þá um sig fyrri árásarhneigð og tók hann upp fyrri iðju. Maggi bjargvættur hans neyddist því aftur til þess að rota manninn svo hann yrði til friðs. Öðruvísi myndi þessa mannbjörg aldrei geta orðið staðreynd. Á rölti þeirra bræðra gekk þetta svona nokkrum sinnum. Maðurinn rankaði við sér á öxlum Magga, réðist á hann og endaði það náttúrulega ávallt með því að Maggi rotaði hann. Lögreglumönnum í Hafnarfirði hefur líklega brugðið nokkuð þegar bjargvættirnir skiluðu manninum í hendur lögreglunnar. Var hann þá orðinn fremur illa útlítandi eftir átökin við bjargvættinn.

2009-04-22T14:58:00.002Z

Stutt í kosningar - Stefán Ólafs mættur
Það er skemmtileg tilviljun að Stefán Ólafsson er ávallt tilbúinn með niðurstöður úr stórmerkilegum rannsóknum rétt fyrir alþingiskosningar. Í þeim kemst hann jafnan að þeirri niðurstöðu að ekki séu allir með sömu laun á Íslandi og launabilið á milli drykkjusjúklings og skipstjóra sé alltaf að breikka. Heimsfrægt varð þegar Stefán komst að þeirri niðurstöðu að skattbyrði hefði hækkað meira hjá þeim sem eru með lægstu launin heldur en hinum. Stefán gat þess þó ekki sérstaklega að skattkerfið virkar einfaldlega þannig að í lægstu launaþrepunum byrja menn að borga meiri skatt þegar þeir fá launahækkanir. Betur hljómar að tala um að skattar hafi ekki verið lækkaðir minna á lægri launin heldur en hærri launin. Nú er Stefán kominn á kreik með 615 tekjuhæstu fjölskyldurnar. Þrautseigur djöfull en kannski ekki sérlega vinsæll á landsbyggðinni eftir að hann gerði skýrsluna fyrir Reykjavíkurborg um flugvöllinn.
Passið ykkur á myrkrinu.

2009-04-20T00:39:00.003Z

ESB
Það er aldrei skynsamlegt að taka stórar ákvarðanir eftir að áföll hafa riðið yfir. Þess vegna var gott að Íslendingar skyldu ekki rjúka til og reyna að komast í útbreiddan faðm ESB strax eftir hrunið. Hvaða skoðanir sem menn kunna að hafa á áhrifum þess að Íslandi gangi í ESB, þá er nokkuð ljóst, að þegar menn eru á annað borð komnir þangað inn þá er ekki ýkja auðvelt að snúa til baka.
Passið ykkur á myrkrinu

2009-04-18T22:34:00.005Z

Orðrétt
"Ég lærði það dálítið snemma í stjórnmálum að sumir sem eru mikið á yfirborðinu, þeir reyna að koma svona merkimiða á andstæðinga sína". Á þessa leið svaraði Steingrímur J. Sigfússon þegar Sölvi Tryggvason spurði hann að því í einkaviðtali sem Skjár 1 sýndi við leiðtoga vinstrigræna, nú viku fyrir kosningar, hvernig hann svaraði þeim sem teldu hann vera einhverskonar "mosakommúnista". Og Steingrímur bætti við: "Oftast eru þetta aðilar sem treysta sér ekki í rökræðuna, þeir eru bullandi á yfirborðinu." Nei, Steingrímur kann ekki við það þegar menn reyna að klína einhverjum svona merkimiðum á pólitíska andstæðinga enda hefur hann í áratugi vitað að það gera bara yfirborðsmenn. Svona eins og þeir sem alla daga æpa "nýfrjálshyggjumaður, nýfrjálshyggjumaður" að andstæðingum sínum. "Komdu þér í stuttbuxurnar drengur", kallaði virðulegur fjármálaráðherra lýðveldisins frammí fyrir alþingismanni sem í fyrradag gagnrýndi yfirvofandi skattahækkanir vinstrigræna úr ræðustóli alþingis. En í sjónvarpsþáttum hefur Steingrímur J. Sigfússon mikla skömm á uppnefnandi yfirborðsmönnum. Honum finnst þeir líklega vera bæði gungur og druslur."

- Vef-þjóðviljinn í dag.

2009-04-16T17:30:00.002Z

Bleik er brugðið
Já nú er bleik brugðið! Síðuhaldari hefur af því spurnir að Bæjarins Besta brúki Munnmælasögu#100 í blaðinu í dag.
Passið ykkur á myrkrinu.

2009-04-16T14:28:00.000Z

Orðrétt
"Leiðtogar Atlantshafsbandalagsríkjanna hittust í fyrradag. Fundurinn var afar mikilvægur en auk þess að vera reglubundinn leiðtogafundur þá var þetta fyrsti fundur sem nýr Bandaríkjaforseti sat, nýr framkvæmdastjóri bandalagsins var valinn og haldið var upp á 60 ára afmæli bandalagsins. Enda komu leiðtogar allra ríkja nema eins, einn þjóðarleiðtogi, forsætisráðherra Íslands, mætti ekki, sökum „anna heimafyrir“.

Meðal þeirra leiðtoga sem ekki höfðu jafn mikið að gera og forsætisráðherra Íslands og gátu því séð af tveimur dögum til fundarhalda, voru Barack Obama, Gordon Brown, Nicolas Sarkozy, Angela Merkel og rúmlega tuttugu aðrir. En forsætisráðherra Íslands var því miður svo upptekinn að hún komst ekki. Enda ekki eins og það hefði komið sér vel að geta rætt málefni landsins persónulega við þetta áhrifalausa fólk sem þarna var. Það er ekki eins og forsætisráðherra Íslands eigi eitthvað vansagt við menn eins og Gordon Brown. Það er ekki eins og það hefði getað hjálpað Íslendingum ef forsætisráðherra Íslands hefði mætt til fundar og nýtt tækifærið til að tala tæpitungulaust um hryðjuverkalög Breta gegn Íslendingum og til að krefjast þess að þau verði tafarlaust afturkölluð og skaði vegna þeirra bættur. Nei, Jóhanna Sigurðardóttir var upptekin heima fyrir."

- Vef-þjóðviljinn hinn 5. apríl 2009.