<$BlogRSDURL$>

Saturday, January 31, 2009

Vanhæfi
Er Pálmi Gestsson vanhæfur til þess að gera grín að Geir H. Haarde ef sonur hans er lífvörður Geirs? Þetta hefur nú verið látið viðgangast í nokkrar vikur án þess að Páll Magnússon eða Þórhallur Gunnarsson axli ábyrgð. Þetta hefði aldrei gerst á meðan Randver var á vaktinni.

Orðrétt
"Nú duga engin.....nú verður að taka á vandanum með almennilegum vettlingatökum."
- Höskuldur Þórhallsson, leikmaður janúarmánaðar, á Alþingi þann 26. janúar 2009.

Thursday, January 29, 2009

Orðrétt
"Hátekjuskattur er mjög vinnuletjandi og þetta eru lágar upphæðir. Tjónið fyrir hagkerfið getur hinsvegar verið mikið."
- Jón Daníelsson hagfræðingur hjá LSE í Kastljósinu þann 27. janúar 2009.

Af hverju Einar Mar?
Einhverra hluta vegna kallaði fréttastofa Sjónvarpsins á Einar Mar Þórðarson stjórnmálafræðing til þess að tjá sig um auknar hvalveiðar Íslendinga. Fór Einar Mar mikinn í alls kyns einkennilegum ályktunum um málið og sparaði síst stóru orðin. Taldi til dæmis að ákvörðunin hlyti að vera sérstaklega umdeild, þrátt fyrir að þingmenn úr öllum flokkum nema einum hafi í mörg ár hópast í ræðustól Alþingis til þess að hvetja til veiða á hval í atvinnuskyni.

Einar Mar hefur verið tíður gestur hjá fréttastofum sjónvarpsstöðvanna sem sérstakur sérfræðingur um íslensk stjórnmál. Það hefur reyndar gengið svo langt að Stöð2 var með hann sem sinn aðal ráðgjafa í síðustu kosningum. Hvers vegna hafa fjölmiðlar svona mikinn áhuga á þessum manni og hafa upp á sitt einsdæmi gert hann að sérfræðingi? Einar Mar Þórðarson er hvorki meira né minna en með BA gráðu í stjórnmálafræði! Það væri því hægt að hóa í þúsundir manna með sömu menntun. Hann hefur reyndar verið í kennaraliðinu í félagsvísindadeildinni en má ekki sjá alfarið um áfanga þar sem aðalkennarar í áföngum verða að vera með mastersgráðu. Hefur það því komið í hlut góðra manna að hafa umsjón með áföngum sem Einar kennir. Einn áfanginn var reyndar lagður niður um daginn þar sem ekki fékkst umsjónarmaður með faginu. Ég bara frábið mér að ríkissfjölmiðillinn hói í mann með BA gráðu til þess að koma með forheimskulegan málflutning um ofureðliegan hlut eins og hvalveiðar. Af hverju var ekki bara hóað í Koppa Valda, Sigga spýtu, Jón sólarhring eða Jóa á hjólinu ??

(Síðuhaldari frábiður sér jafnframt alla háðsglósur Halldórs Magnússonar vegna skrifa um prófgráður í þessari færslu)

Passið ykkur á myrkrinu.

Wednesday, January 28, 2009

Þjóðstjórnin
Ef mynduð verður þjóðstjórn þá gæti hún litið svona út að hluta til:

Forsætisráðherra:
Jónína Benediktsdóttir. Kynnti rannsóknir um krosseignatengsl í Silfrinu en engin hlustaði.

Utanríkisráðherra: Ásgeir Þór Davíðsson á Goldfinger. Er með góð sambönd erlendis.

Samgönguráðherra: Friðrik Ómar. Getur malbikað heim til sín í Svarfaðardal eins og Steingrímur J. Bjarnfreðarson malbikaði heim til sín í Þistilfjörð sem Samgönguráðherra 1988 - 1991.

Menntamálaráðherra:
Árni Johnsen. Tónlistamaður og áhugamaður um Þjóðleikhúsið.

Dóms og kirkjumálaráðherra:
Gunnar Þorsteinsson í Krossinum. Auga fyrir auga.

Passið ykkur myrkrinu.

Orðrétt
"Menn í hvalaskoðunarfyrirtækjunum hafa nú haft hátt. Sjáðu kúrfuna hjá þeim, hún er á leið til tunglsins."
- Kristján Loftsson í Hvalnum í Kastljósinu í kvöld.

Wednesday, January 21, 2009

Rannsóknir
Þar sem síðuhaldari er metrósexúal maður þá hefur hann gert vísindalegar rannsóknir í eldhúsinu. Sem betur fer er til hjartahlýtt fólk sem framleiðir tilbúna matvöru til sölu og því engin sérstök þörf fyrir að stunda eldamennsku í sjálfu sér. Sérstaklega ekki í eins manns dúfnakofa. En burt séð frá því þá hefur síðuhaldari fundið út hvað sé einfaldasta og fljótlegasta eldamennska sem fyrir finnst. Af því sem flokkast getur undir eldamennsku þá telur síðuhaldari að sú framkvæmd að spæla egg hljóti að vera einfaldasta og fljótlegasta eldamennska sem um getur. Ef lesendur geta bent á eitthvað einfaldara og fljótlegra þá eru allar ábendingar vel þegnar á commentakerfinu. Ég hef verið að velta því fyrir mér hvort það væri markaður fyrir matreiðsluþátt í sjónvarpi sem síðuhaldari myndi sjá um? Siggi Hall var til dæmis með þætti þar sem hann ferðaðist um heiminn og horfði á aðra elda. Hver man ekki eftir setningum eins og: "Þetta er hann Fabio vinur minn" Síðuhaldari hefur ekkert á móti eldamennsku - hann getur horft á fólk elda tímunum saman. Svo er spurning hvort maður segi einhvern tíma söguna af því þegar HáEmm bauð vinum sínum í mat og sauð hangikjöt.

Passið ykkur á myrkrinu.

Fyrirspurn
Bloggi fólksins barst á dögunum fyrirspurn í tölvupósti frá verndaranum sjálfum Halldóri Magnússyni, a.k.a HáEmm. Hún verður hér birt án góðfúslegs leyfis.

"Þú sem allt veist úr ríki Óla spæleggs. Af hverju skráir mbl.is mig inn sem Kristjönu Þuríði Þorláksdóttur þegar ég sæki moggann á netinu?

Hverjir hafa rangt fyrir sér, mogginn eða kirkjubækurnar?

Presturinn sem skýrði mig er dauður þ.a. það flækir málið líka!"

Passið ykkur á myrkrinu.

Tuesday, January 13, 2009

Orðrétt
"Þorsteinn Másson hefur gert þetta við mig oftar en einu sinni. Að vísu fékk ég hann ekki í andlitið og ég tek fram að Steina reis ekki hold. Í dómi Héraðsdóms Suðurlands segir: að sú háttsemi að fá beran getnaðarlim í andlit eða á líkama, gegn vilja sínum, hlýtur að brjóta gegn kynfrelsi einstaklingsins og teljast auk þess siðlaus háttsemi. Breytir þar engu um að sú háttsemi sé talin eðlileg af einstökum einstaklingum, hópum eða undir vissum kringumstæðum. Mér var alltaf meinilla við þetta, en það tíðkaðist víst í einhverjum hópum í kringum Steina að ota typpinu í náungann."

- Smári Karlsson, kosningastjóri Funklistans, á bloggi sínu þann 8. janúar 2009.

Friday, January 09, 2009

Munnmælasögur#94
Á meðal árlegra vorboða í sódómunni er víðavangshlaup ÍR. Síðuhaldari hefur blessunarlega aldrei tekið þátt en eitt árið voru vinirnir Hannes Már Sigurðsson og Bogi Mölby Pétursson skráðir til leiks. Eitthvað var farið að hægjast á Hannesi á þessum tíma eftir að hafa synt eins og höfrungur árum saman. Bogi var hins vegar ennþá að spila fótbolta með Víkingi Ó. Hannes var nýlega byrjaður að hlaupa sér til heilsubótar og skoraði á Boga að mæta í víðavangshlaup ÍR. Bogi þóttist vita að sinn gamli félagi frá Laugarvatni væri dottinn úr formi og reiknaði ekki með mikilli mótspyrnu frá Hannesi í hlaupinu. Bogi var nokkuð seinn fyrir en sá að Hannes hafði mætt snemma og komið sér fyrir á meðal fremstu manna við rásmarkið. Þegar keppendur voru komnir af stað missti Bogi fljótlega sjónar á Hannesi en hafði ekki of miklar áhyggjur af því fyrst í stað. Taldi að kappinn myndi nú bara sprengja sig á því að fara af stað með látum. Ekki leið þó á löngu þar til Bogi fór að keyra upp hraðann svona til öryggis en honum til mikillar undrunar þá sá hann aldrei aftan á hælana á Hannesi. Var Boga farið líka þetta illa og setti allt í botn á miðri leið. Þegar það dugði ekki einu sinni til þá hægði hann ferðina aftur og játaði sig nánast sigraðan. Þá sér Bogi gamla bekkjarsystur sína frá Laugarvatni vera að taka fram úr sér og gaf allt í botn á ný og tókst að klára hlaupið á alveg þokkalegum tíma en gersamlega úrvinda af þreytu. Bogi skildi ekkert í því af hverju Hannes var hvergi sjáanlegur. Gat það verið að Hannes hefði verið svo langt á undan að hann hefði ekki einu sinni nennt að bíða eftir honum við marklínuna? Þegar heim var komið hringdi Bogi blóðillur í Hannes og las honum pistilinn fyrir að plata sig í víðavangshlaup og láta sig svo hverfa eftir hlaupið. Þá kom hins vegar í ljós að Hannes hafði úðað í sig Ripped fuel pillum og alls kyns orkudrykkjum í aðdraganda hlaupsins. Eftir 400 metra þá var Hannes kominn með svo öran hjartslátt að hann þorði ekki öðru en að hætta keppni !

Sunday, January 04, 2009

Grein um Albert
Síðuhaldari býður upp á grein um knattspyrnuferil Alberts Guðmundssonar í Mogganum í dag ef einhverjir lesendur skyldu hafa áhuga á því. Þetta ætti kannski að gleðja þá fjölmörgu Arsenal menn sem kíkja á þessa síðu.
Passið ykkur á myrkrinu.

This page is powered by Blogger. Isn't yours?