<$BlogRSDURL$>

Friday, June 29, 2007

Hugheilar þakkir
Síðuhaldari þakkar vinum og kunningjum fyrir auðsýnda hluttekningu og vináttu á erfiðum tímum hjá KR. Nú þegar lukkan er gengin í lið með okkur þá er aldrei að vita nema Vesturbæjarstórveldið verði heppið í sex til sjö leikjum í viðbót og bjargi sér.

Orðrétt
"Mjög athyglisverð umræða um vanda atvinnulífs á Vestfjörðum í Kastljósinu í kvöld.

Ég er hjartanlega sammála Pétri Blöndal, þó hans sýn sé vissulega nokkur einföldun. Það sem vantar er að hrinda aðgerðum í framkvæmd. Hugmyndin um annað skattþrep úti á landi stenst engan skoðun. Bæði gildir það grunnprinsipp í byggðamálum að slík aðgerð bætir ekki undirliggjandi stöðu heldur er bara plástur, styrkur, ofan á vandamálin. Þá lofar reynslan ekki góðu, t.d. frá Noregi. Þar að auki myndi svona tilfæring setja skattkerfið í uppnám. Það þarf að hætta svona bullumræðu um flutningsjöfnun og skattþrep og drífa í því sem skiptir máli:

Bæta hagstjórnina og ná þjóðhagslegu jafnvægi
Hætta stuðningi við einstaka atvinnugreinar, sérstaklega virkjanir og álver
Byggja upp samgöngukerfið og fjarskipti
Flytja opinber störf út á land
Byggja upp háskólakeðju um landið
Taka Jöfnunarsjóð sveitarfélaga í gegn svo sveitarfélög á landsbyggðinni sitji við sama borð og þau fyrir sunnan
Koma á verslunarfrelsi með afnámi tolla og tæknilegra viðskiptahindrana
Bjóða öllum framsóknarmönnum að flytja til Vestmannaeyja og stofna sjálfstætt ríki

Seint átti ég von á að verða innilega sammála Helga Hjörvari en það gerðist um daginn. Hann bendir á það í nýlegum pistli á visir.is að engum eigi að koma á óvart að vandræði séu í atvinnulífinu á Vestfjörðum þegar ennþá er malarvegur milli höfuðborgarinnar og höfuðstaðar Vestfjarða. Að lokum er rétt að fordæma Vestfjarðaaðstoðina og vona að fólk haldi sönsum til að forðast slíkt mannorðssjálfsmorð í hita leiksins.

P.s. verð að taka sérstaklega undir með Pétri Blöndal að þó verulega hart sé á dalnum þá má samt ekki gleyma öflugu framtaki sem er víða að finna. Ekki síst þeirri snilld sem felst í sjóstangaveiðibransanum. Held að forfeðurnir séu heldur betur kímnir yfir því að ekki þurfi lengur að fara á sjó til að sækja gull í greipar ægis heldur borgi útlendingar stórfé fyrir að velta sér upp úr slorinu."

- Kristinn Hermannsson, master í Hagfræði og sérfræðingur í byggðamálum, á heimasíðu sinni í kvöld.

Wednesday, June 27, 2007

Þekktustu lög REM
DV sagði frá því í gær að REM hafi komið til landsins. Þeir hafi þá nýtt tækifærið til þess að upplifa sjálfan Megas holdi klæddann. Fjallað er um Íslandsferð hljómsveitarinnar og svo er þess getið að á meðal þeirra þekktustu laga séu: Everybody hurts, Man on the moon, Losing my religion, What´s the frequency Kenneth og mörg fleiri. Undir þetta ritar einhver dori@dv.is. Jú þau eru náttúrulega mörg fleiri. Ef mið er tekið af þessum dæmum þá gerðist harla lítið hjá hljómsveitinni svona fyrsta áratuginn. Lög eins og Orange crush, Stand, The one I love og End of the World eru alla vega ekki nefnd í upptalningunni. Ekki neitt þeirra raunar. Sjálfsagt er þessi dori@dv.is mikill spekingur og kannski meira að segja með eitthvað merkilegt viðurnefni sem hann hnýtir fyrir aftan Dóri: Dóri 3000, Dóri DNA, Dóri lífssýni, Dóri 800 eða Dóri djöffsi. Þá finnst mér nú Dóri Magg vera merkilegra.

Friday, June 22, 2007

Kvennaliðið í forgang
Það liggur ljóst fyrir hvort A-landsliðanna í knattspyrnu er betra, karla eða kvennaliðið. KSÍ ætti nú að láta kvennaliðið í algeran forgang og láta karlaliðið svo mæta afgangi. Það mætti svo sem útfæra slíkt með áþreifanlegum hætti. Til dæmis ef leikmenn karlaliðsins myndu ganga í hús og selja klósettpappír fyrir ferðasjóð kvennaliðsins. En þetta er bara hugmynd. Annars fannst mér ekkert sérstaklega sniðugt hjá Ásthildi að lýsa því yfir að þær væru besta íþróttalið landsins. Það er ljóst að þær eru besta knattspyrnulið landsins - en kannski óþarfi að blanda öðrum íþróttagreinum í metinginn.

Wednesday, June 20, 2007

Orðrétt
"Mikilvægt er að birtingarmynd umræðunnar verði ekki sú að þjóðin standi andspænis tveimur vandamálum: Of fáum þorskum í sjónum og of mörgum þorskhausum á þurru landi."
- Þorsteinn Pálsson ritstjóri Fréttablaðsins í leiðara í vikunni.

Monday, June 18, 2007

Orðrétt
"Þá á ég bara eftir að fá Nóbelinn. Ég slepp ekki fyrr við að taka þátt í heimilisstörfunum. Það segir Lufsan allavega alltaf þegar ég segi: Þrífa klósettið? Ég? Heldurðu að Halldór Laxness hafi þrifið klósettið á Gljúfrasteini? Þá segir hún: Fáðu Nóbel. Svo sjáum við til."
- Dr. Gunni Grímuverðlaunahafi á bloggi sínu 16. júní 2007.

Wednesday, June 13, 2007

Munnmælasögur#64
Einn af uppáhalds Íslendingum síðuhaldara er Séra Baldur Vilhelmsson fyrrum prófastur í Vatnsfirði. Nú eru gríðarlega margar munnmælasögur af Baldri þegar komnar á prent og ástæðulaust að birta þær hér þó magnaðar séu. Ég ætla hinsvegar að birta tilsvar úr sjónvarpsþætti sem gerður var um kappann fyrir nokkrum árum og hét því snilldarnafni: "Mér líkar ekki malbikið." Í þættinum (sem ég tók upp) kemur Baldur inn á að hann hafi töluvert stúderað Grikkland til forna. Hann hefur sum sé lesið heilmikið af forngrískum bókmenntum, og kom því skemmtilega á framfæri þegar hann var spurður að því hvaða bækur væru á náttborðinu hjá honum: "Ég hef lítið kynnt mér þessa yngri höfunda eins og Snorra Sturluson" !!

Wednesday, June 06, 2007

Orðrétt
"Kristján hefur betrumbætt hugmyndir mínar um gildi líkamsræktar og holls mataræðis til frambúðar, enda uppfullur af gagnlegum fróðleik sem auðsótt er að leita í.
Fyrir mér eru æfingar undir hans stjórn mikið tilhlökkunarefni, þar fer góð blanda af faglegum vinnubrögðum og góðum félagsskap."
- Sigurbjörg Gunnarsdóttir á Þjálfun.is þann 6. maí 2005 í liðnum Meðmæli með Kristjáni Jónssyni einkaþjálfara.

Hvernig á maður að svara þessu?
Man ekki hvort ég hafi einhvern tíma sagt ykkur frá einkennilegum tónlistarsmekk nágranna míns. Nú vita það bæði Guð og menn að síðuhaldari hefur ekki þungar áhyggjur af því hvað þykir hipp og kúl þegar kemur að tónlist. Hins vegar er tónlistarsmekkur nágranna míns svo yfirgengilega óútreiknanlegur að ég veit ekki hvernig ég á að bregðast við. Fyrir einhverjum misserum síðan setti þessi ágæti nágranni minn gjarnan 80´s slagarann "Forever young" á repead og hækkaði duglega. Ef lagið var ekki á repead þá hljómaði í mesta lagi eitt lag á milli áður en "Forever young" glumdi í eyrum síðuhaldara. Til þess að svara þessu á einhvern hátt þá spilaði síðuhaldari kannski Gylfa eða Lúdó svona til þess að sjá hvort lækkað yrði niður í "Forever young" - þó ekki væri nema örlítið. Ekki gekk það og lengi var þetta lag númer 1 2 og 3 þegar nágranni kaus að setja allt í botn, sem hann virðist hafa nokkuð oft þörf fyrir.

Í síðustu viku tók svo steininn úr. Þá náði þessi ágæti nágranni minn nýjum hæðum í frumleika sínum. Þá glumdi allan sólarhringinn lag sem ég þurfti satt að segja að fletta aðeins upp í hauskúpunni. En það kom þó fljótlega enda heyrðist það skýrt og greinilega yfir í mína íbúð. Um var að ræða lag sem heitir "Amigos para siempre" sem á engilsaxnesku útleggst "Friends for life". Þetta lag var annað af tveimur lögum Ólympíuleikanna í Barcelona árið 1992. Þetta lag var sem sagt á repead nótt sem nýtan dag. Hvernig á maður að svara þessu? Þarf maður að finna lag Heimsmeistarakeppninnar í handbolta á Íslandi 1995? Minni að Diddú hafi sungið það ásamt Bó eða einhverjum.

Orðrétt
"Það er óhuggulegt að sjá múgsefjunina sem farið hefur á stað í kringum þetta mál þar sem hver apar eftir öðrum og engin sjálfstæð eða gagnrýnin hugsun ríkir. Ásgeir bróðir minn er kallaður ógeðskall klámhundur og klámkóngur eða öðrum viðlíka nöfnum sem ekkert hafa með hans viðskipti að gera. Hví ætti hann að vera örðuvísi en aðrir bissnismenn sem reka fyrirtæki í hinum ýmsu geirum, en hafa lítinn sem engan persónulegan áhuga á á starfseminni. Heldur er um púra viðskipti að ræða og þannig er það með bróður minn eins og marga aðra. Síðan koma setningar um að Ásgeir bróðir minn blóðmjólki stúlkurnar; já það er fullyrt. Hvaðan ætli sú vitneskja komi eða er svona dylgjum ekki bara slegið fram út í loftið? Staðreyndin er sú að stúlkurnar hafa ágæt laun og margar stúlknanna eru íslenskar. Kynsystur mínar þekki ég ekki rétt ef þær láta sig hafa það að dansa á Goldfinger fyrir smánarlaun.

Þau skrif sem ég hef rekist á bera öll að sama brunni; byggð á vanþekkingu og sleggjudómum. Það lýsir fyrst og fremst hugsunargani þeirra sem hneysklast hvað mest að telja dans í kringum súlu eitthvað kynferðislegt og óeðlilegt. Að engin kona geti haft gaman af að dansa þannig. Læt ég mig efast um að það sjáist meira af sköpunarlagi þeirra kvenna en dönsurum íslenska dansflokksins í mörgum sýningum þess ágæts balletsflokks. En það er auðvitað svo menningarlegt, hitt er dónalegt!!!. "
- Bergljót Davíðsdóttir blaðamaður í hreint magnaðri færslu á bloggi sínu sifjar.blog.is.

Saturday, June 02, 2007

Aðkoma síðuhaldara að fræga Ísafoldarblaðinu
Fyrir þá sem hafa áhuga þá er ykkar einlægur síðuhaldari með ilmandi fínt viðtal í nýja Ísafoldarblaðinu. Í eina skiptið sem síðuhaldari hefur ritað efni í þetta tímarit keppast aðrir fjölmiðlar við að auglýsa þetta tiltekna tölublað. Vegna kristilegs uppeldis síðuhaldara var hann með viðtal við kylfing í blaðinu, Jón Ara Ólafsson, en ekki fólk sem starfar á nóttunni.

Orðrétt
"Ég hef undir höndum myndir af yfirmönnum Ísafoldarfeðganna sem teknar voru í veiðihúsi og með þeim á myndunum eru útlendar konur sem ekið var uppdópuðum frá höfuðborgarsvæðinu í veiðihúsið og höfðu þær mikið að gera við að fullnægja þörfum gestanna með lokað að sér. Sumir en ekki allir.

Framleiðendum og öðrum birgjum var boðið í svallið. Ef ég býð Ísafoldarfeðgum myndirnar til birtingar, býst ég ekki við að þeir þiggi, jafnvel þótt greiðsla fylgi!
Ég veit að það er bannað að vera með myndavél í slíkum einkasamkvæmum, en freistingin var mikil. Það skal tekið fram til að forðast misskilning að ég tók ekki þessar myndir........"
- Heimir L. Fjeldsted vagnstjóri á bloggi sínu hlf.blog.is í dag.

This page is powered by Blogger. Isn't yours?