Á meðan laufin sofa liggja spaðarnir andvaka

Bingi á þingi í borgarstjórn
Gamall kollegi minn af Mogganum varð sigurvegari í prófkjöri Framsóknar um helgina. Björn Ingi var þingfréttaritari Moggans á sínum tíma og gekk undir nafninu Bingi á þingi. Þessi úrslit koma ekki á óvart í ljósi þess að Guðmundur Halldór Björnsson; a.k.a. Sölumaður Íslands, var með Binga í liði. Vert að óska Guðmundi til hamingju með þetta. Í þessu samhengi er rétt að minna á að Guðmundur er bindindismaður á áfengi og tóbak.
Passið ykkur á myrkrinu.

Danni í módelbransanum
Er enginn annar en ég orðinn leiður á því að vera með andlitið á Hálfdáni Gíslasyni fyrir framan sig allan daginn? Ég er heilu og hálfu dagana með fasteignavef mbl opinn fyrir framan mig og ef andlitið á Danna er ekki að brosa framan í mig þá er það Lárus Páll Pálsson herbergisfélagi minn á Laugum fyrir áratug síðan. Þessir menn hafa greinilega einungis verið ráðnir til Íslandsbanka út á útlitið. Nú bíður maður bara eftir því að Magnús Pálmi Örnólfsson umboðsmaður Nasdaq vísitölunnar á Íslandi og Guðmundur Magnús Daðason fulltrúi Fiskistofu í Íslandsbanka, taki þátt í auglýsingaherferðinni.
Passið ykkur á myrkrinu

Munnmælasögur#40
Nú hafa Munnmælasögurnar náð þeim merkilega áfanga að vera orðnar 40 talsins. Í tilefni af þessum tímamótum mun aðstoðarskólastjóri í Kópavogi, sem ekki vill láta nafn síns getið, standa fyrir flugeldasýningu í Hamraborginni á miðnætti. En saga númer fjörtíu fjallar um Loga nokkurn Bergmann einn af mörgum félögum mínum úr Morgunblaðsboltanum. Gjörið svo vel:

"Logi Bergmann Eiðsson var sérfræðingur í því að hrekkja samstarfsmenn sína á RÚV og lagði í það mikla vinnu oft á tíðum. Eitt sinn þegar hann var vaktstjóri þá fékk hann að komast í textann sem fréttaþulur kvöldsins les af skjá fyrir framan sig. Elín Hirst var að lesa þetta kvöldið og Logi hagræddi aðeins endingunni sem yfirleitt er alltaf sú sama. Í lok fréttatímans segir Elín: Við verðum svo aftur hér á sama tíma annað kvöld, uhhhhhhhh veriði sæl. Þar sem Elín hikaði hafði Logi sem sagt tekið út kveðjuna veriði sæl og sett inní "og fokkiði ykkur svo" !!! Sem betur fer fyrir feril þeirra beggja beit Elín ekki á agnið enda buguð af reynslu."

Handkastið
Jamm handkastið byrjar með sigri á serbneskum skæruliðum. Nú er hætt við því að þjóðin fari á hliðina, sérstaklega ef Danirnir verða lagðir í kveld. Vörnin kom mér verulega á óvart í gær. Jákvætt að Viggó lét Vigni spila meira í vörninni en í æfingaleikjunum. Svo eigum við Grjótkastarann úr Breiðholtinu, Einar Hólmgeirs, alveg inni því hann var rólegur í gær. Ég er hræddur um að þessi radarvari, sem Árni Friðleifs og hinar mótorhjólalöggurnar eru búnar að koma fyrir á bak við mörkin, muni bræða úr sér þegar grjótkastarinn byrjar að bomba á markið. Leikurinn í kveld verður skemmtilegur, alltaf gaman að horfa á Joakim Boldsen, hann er snarruglaður. Annars er ég hræddur um að vinstri vængurinn, Bo Stellerberg og Lars Christiansen muni fara illa með okkur. Ég spái dönskum sigri, svona til að hafa vaðið fyrir neðan mig. Ef Ísland vinnur í kvöld þá finnst mér við hæfi að gamlar kempur úr BÍ og Herði verði heiðrarar á sólarkaffi Ísfirðingafélagsins á Breiðvangi í kveld. Verndari Bloggs fólksins: HáEmm, verður fulltrúi síðunnar á skemmtuninni.
Passið ykkur á myrkrinu.

Tónlistarverðlaunin í kvöld
Horfið á íslensku tónlistarverðlaunin í sjónvarpinu í kvöld. Hljómsveitin Ég er með þrjár tilnefningar og mun koma fram og taka lagið. Tilnefningar: Plata ársins tilnefnd sem plata ársins í rokki/jaðar, Eiður Smári Guðjohnsen tilnefnt besta lagið og myndbandið við lagið Kaupið plötu ársins er tilnefnt sem besta myndbandið. Ég spái því að Eiður verði valið besta lagið. Kannski óskhyggjan sé spádómsgáfunni yfirsterkari en skítt með það.
Passið ykkur á myrkrinu.

Kalli lítur um öxl
Bendi lesendum mínum á að trúbadorinn geðþekki, Kalli Hallgríms (Halla málara og Stínu Halldórs), er oft með skemmtilegar sögur á blogginu sínu. Oft er hann að rifja upp einhver bernskubrek eða minningar frá Bolungarvík. Mæli með skemmtilegum sögum frá Holtastígnum og sérstaklega umferðarmenningunni í götunni. Skemmtilegur postmodernismi í því að vera á skrifa gamlar bolvískar sögur á Macca á Njáluslóðum. Ljómandi fínar tvíbökur.
Passið ykkur á myrkrinu.

Orðrétt
"Ég hef aldrei verið í marki og veit ekki hvernig markmenn hugsa. Þeir eru bara í allt annari íþrótt en við hinir"
-Ólafur Stefánsson handknattleiksundur í útvarpsviðtali á 91,9 á dögunum.

Orðrétt
"Hann hefur ýmsa ágæta kosti þrátt fyrir að hann sé bróðir minn."
-Óttar Felix Hauksson um Svein Rúnar Hauksson í DV á dögunum.

Kobe gefðann!
Kobe Bryant leikmaður Lakers skoraði 81 stig í leik í NBA í nótt. Leikurinn var að mér skilst ekki framlengdur og Lakers liðið skoraði 122 stig í leiknum. Það voru því lauslega reiknað 41 stig til skiptanna fyrir samherja hans. Engum hefði ég treyst betur til þess að skora slíkan fjölda stiga heldur en Kobe en hann gaf síðast boltann í streatball-móti á Rhode Island árið 1989. Þetta er nú samt ágætt hjá honum greyinu.
Passið ykkur á myrkrinu

Ögmundur á fjölmiðlavaktinni
Hinn skemmtilegi þingmaður Ögmundur Jónasson er duglegur að uppfæra heimasíðu sína. Í vikunni vakti hann athygli lesenda sinna á mjög alvarlegu máli: Annar ritstjóri DV er hægrisinnaður! Um þetta skrifaði Ögmundur eins og hann hefði orðið vitni að glæp og væri að tilkynna lögreglunni það. Hann gagnrýndi ekki ákveðna þætti í skrifum ritstjórans heldur benti einfaldlega á að maðurinn væri hægri sinnaður. Sem á þá sennilega ekki við þegar menn starfa í fjölmiðlum að hans mati. Hann átti við Björgvin Guðmundsson sem sannarlega er fyrrverandi formaður Heimdallar. En það er óþarfi að rjúka upp til handa og fóta að þessu tilefni, ekki nema Ögmundur verði var við rangfærslur eða blekkingar í skrifum Björgvins. Ögmundur má vera minnugur þess að eitt sinn var einn helsti stjórnmálaskýrandi Stöðvar2, fyrrverandi formaður ungliðahreyfingar Alþýðubandalagsins, og þar af leiðandi fyrrverandi flokksbróðir Ömma. Það er Róbert Marshall sem síðar varð formaður blaðamannafélagsins og því ljóst að fjölmiðlamenn láta sér í léttu rúmi liggja þó fólk í þeirra röðum hafi gegnt trúnaðarstörfum fyrir stjórnmálaflokka. Enda þarf það ekki að vera einhver heimsendir. Varla var Ögmundur gersamlega skoðanalaus á meðan hann var fréttamaður á RÚV? Hann var ekki slæmur fréttamaður þó hann væri pólitískur.
Ögmundur og Einar Kristinn eru góðir vinir. Eins og stundum er á meðal vina þá eru þeir ósammála um allt og alla. Nema kannski að himininn sé blár, en þó er ekki víst að Ögmundur hafi sagt sitt síðasta í þeim efnum. Þeir félagar hafa nú verið að munnhöggvast sín á milli á heimasíðum sínum, en það er alltaf gaman að fylgjast með þeim rífast, enda hafa þeir áralanga reynslu af því.
Passið ykkur á myrkrinu.

Fjölmiðlar 2004
Síðuhaldari hefur loksins drifið í því undanfarið að lesa bókina Fjölmiðlar 2004 eftir Ólaf Teit Guðnason. Fyrir þá sem ekki vita þá er Ólafur Teitur blaðamaður á Viðskiptablaðinu og hefur einu sinni í viku skrifað pistla sem eiga að veita íslenskum fjölmiðlum aðhald. Í bókinni er sem sagt búið að safna saman öllum pistlum ársins 2004. Það er alger vakning að lesa þetta. Ótrúlegt hvað íslenskir fjölmiðlamenn gera mikið af því að villa um fyrir neytendum sínum. Hálfkveðnar vísur o.s.frv. Þegar maður les eða heyrir slíka frétt, þá gerir maður sér ekki grein fyrir því að hún sé röng því maður fær kannski ekki allar hliðar málsins. Og til þess að átta sig á því hve framsetningin er villandi þarf maður að rannska málið. Sem maður gerir ekki og því fínt að hafa einhvern á vaktinni eins og Ólaf Teit. Svo hafa fjölmiðlarnir vonandi aðhald hver af öðrum, maður sér til dæmis hvernig blöðin hnýta hvert í annað ef upp kemst um rangfærslur í fréttaflutningi. Ég ætla að taka ágætt dæmi úr bókinni: Jónas Kristjánsson fyrrverandi ritstjóri DV skrifaði harðorðann leiðara um dóm sem kona fékk fyrir búðarhnupl. Skrifaði hann um dóminn, sem var 6 mánaða fangelsi, sem einhvers konar árás á fátækt fólk því konan hefði einungis hnuplað nauðsynjum að litlu verðmæti. Fór þessi riddari sannleikans mikinn varðandi þetta meinta lögregluríki sem Ísland væri orðið. Eftir að hafa lesið leiðarann getur ekki annað hafa hvarlað að fólki en að dómskerfið sé bara í algeru skralli, að fátæklingur sitji inni í hálft ár fyrir það eitt að reyna að bjarga sér. Það sem riddara sannleikans láðist hins vegar að nefna, var að um var að ræða síbrotamann sem trekk í trekk hafði brotið skilorð. Fyrsti dómur hennar fyrri hnupl var auðvitað vægur, en dómarnir harðna eftir því sem brotunum fjölgar og skilorð eru rofin. Með því að taka það fram hefði broddurinn verið farinn úr þessum leiðara og því ágætt að það komi ekki fram.
Passið ykkur á myrkrinu.

Orðrétt
Bogi Pétursson sigraði á Arctic open í sumar. Hann hefur ekki komið til greina?
-Gunnar Samloka Sigurðsson Group spyr Hörð Magnússon íþróttafréttamann í Strákunum í gærkvöldi í tilefni af kjöri íþróttamanns ársins.

Af Reyni Trausta
Reynir Traustason ritstjóri Mannlífs heldur úti bloggsíðu á vefsvæði tímaritsins, sem virðist eiga að vera einhvers konar skúbbsíða. Það gæti orðið athyglisvert að fylgjast með þessu því Reynir er þekktur skúbbari og getur grafið upp ótrúlegustu hluti, eins og þegar fundargerð frá stjórnarfundi hjá Baugi féll í fangið á honum án þess að stjórnin gerði við það athugasemdir(af hverju ættu Sigga og Grétar svo sem að skipta sér af því). Annars skilst mér að Reynir sé að gera heimildarmynd um Sigga Pé. Þó Siggi sé með athyglisverðari mönnum þá hef ég nú mínar efasemdir um að Siggi sé mjög spenntur fyrir þessu. Þó veit ég ekkert um það. Ég veit hins vegar fyrir víst að hann var ekkert sérstaklega kátur þegar Reynir var með hann á DV forsíðunni á sínum tíma. En ef Reynir nær að koma kallinum í rétta gírinn í þessari mynd þá verður hún skemmtileg.
Passið ykkur á myrkrinu.

Munnmælasögur#39
Á mánudegi fyrir nokkrum árum var síðuhaldari dreginn á svokallað októberfest af skólastjóranum nýfyndna Valdimari Víðissyni. Mun þetta hafa verið veturinn sem Valdimar stundaði nám í HÍ og vildi kenna síðuhaldara eitt og annað sem hann þyrfti að læra að mati Valdimars, sem taldi síðuhaldara vera afdala sveitamann sem hefði ekki einu sinni heyrt minnst á Roger Whittaker. Valdimar seldi síðuhaldara þá hugmynd að þeir færu á pöbbarölt á mánudagskveldi í tilefni af októberfest sem Valdimar sagði alltaf hafa verið haldið hátíðlegt í menntastofnuninni MA. Eftir að félagarnir höfðu dreypt á nokkrum öllurum í miðbænum til samlætis gömlum MA-nemum gerði Valdimar síðuhaldara grein fyrir nauðsyn þess að þeir færu á stað sem heitir Skipperinn. Var því fylgt úr hlaði með þeirri röksemdafærslu að Valdimar væri kominn í beinan karllegg af skipstjórum aftur í miðaldir. Siðuhaldari gerði sér á þessari stundu enga grein fyrir því hvaða fólk væri að frekventera þennan ágæta pöbb en upplifuninn var eftirminnileg þegar þangað var komið. Valdimar byrjaði á því að þylja upp fyrir vertinum hvað öll skipin á myndunum á veggnum hétu. Eftir það fór hann á trúnaðarstigið með alþýðuskáldinu Bergþóru Árnadóttur á meðan síðuhaldari diskóteraði undirheimana við eina aðalpersónu heimildarmyndarinnar Skuggabörn. Eftir því sem næst verður komist voru Valdimar og Bergþóra ósammála um hvor hefði verið betri: Sigfús Halldórsson eða Skapti Ólafsson.

Vissir þú...?#5
Vissir þú að íslenska vatnið er í 19. sæti á lista Unesco yfir tærasta drykkjarvatn í heiminum? Unesco er skammstöfun fyrir hið þjála og lipra nafn: United Nations Educational Scientific and Cultural Organization! Þetta er svona svipaður árangur og hjá Selmu í Júgurvísjón. Algert áfall.
Passið ykkur á myrkrinu.

Deila Hallgríms og Egils um Moggann
Egill Helgason skrifaði pistil um daginn á Vísi þar sem hann setti mjög út á grein sem Hallgrímur Helgason hafði skrifað um Moggann. Var sú grein víst full af heift og árásum. Árásirnar voru víst ekki bara á blaðið heldur líka persónulega á Matthías og Styrmi. Smekklegheit hafa kannski aldrei verið sterkasta hlið Hallgríms þó innlegg hans séu oft hressandi. En hann er orðinn eitthvað ógurlega bitur í seinni tíð. Það væri gaman að vita hvort Hallgrími finnist Styrmir og Matthías fara halloka í samanburði við aðra kollega þeirra eins og Jónas, Illuga, Mikael eða Gunnar Smára. Kannski eru það allt stakir heiðursmenn að mati Hallgríms, maður spyr sig. Annars eru fínir punktar í þessu hjá Agli og fremur sjaldgæft að hann sé svo ósammála Hallgrími auk þess sem Egill tekur sjaldnast upp hanskann fyrir Moggann.
Passið ykkur á myrkrinu.

Orðrétt
Í dag verða haldnir miklir tónleikar og ætlað að lýsa andúð tónleikahaldara á virkjunum. Það hlýtur að mega treysta því að tónleikarnir verði órafmagnaðir.

Viðskiptablaðinu í gær er birt leiðrétting á grein úr þarsíðasta blaði. Sú grein hafði einhverra hluta vegna nefnst „Alvöru líkamsrækt fyrir alvöru fólk“ og þá væntanlega til aðgreiningar frá gervilíkamsrækt sem platfólk stundar. Jæja, leiðréttingin hljómaði svona og um mikilvægi hennar eru vandfundin nægilega áhrifamikil orð: „Í grein Viðskiptablaðsins „Alvöru líkamsrækt fyrir alvöru fólk“ sem birtist á miðvikudaginn síðastliðinn voru nokkrar staðreyndavillur. Í fyrsta lagi heitir einn af þjálfurum Bootcamp Evert en ekki Everett. Í öðru lagi er nýtt Íslandsmet í Þrekmeistaranum 12 mínútur og 39 sekúndur en ekki 13 mínútur og 7 sekúndur. Heimsmetið er ekki 12 mínútur og 34 sekúndur heldur í kringum 12 mínútur. Það er ekki rétt að búið sé að koma upp útibúi Bootcamp á Akureyri heldur eru viðræður í gangi um útibú þar ásamt Akranesi og Keflavík. Beðist er velvirðingar á þessum mistökum.“

Beðist velvirðingar! Beðist velvirðingar! Halda menn bara að það sé hægt að slá því fram að heimsmetið í Þrekmeistaranum sé 12 mínútur og 34 sekúndur þegar það er í raun í kringum 12 mínútur? Koma svo bara seinna og segja afsakið. Og þá sé bara allt í lagi. Hvað með þær þúsundir sem auðvitað hafa lesið greinina „Alvöru líkamsrækt fyrir alvöru fólk“ og hafa síðan gengið um bæinn og fullyrt í allar áttir að heimsmetið sé tólf þrjátíuogfjórar? Svo reynist heimsmetið vera nákvæmlega í kringum tólf. Hvorki sekúndu skemmra né lengra. Þetta fólk er núna brennimerkt og allt út á fúsk. Og hvað með alla þá Akureyringa sem eru búnir að fara í Bootcamp-útibúið og biðja um Everett? Sumir þegar byrjaðir að æfa hjá honum í von um að komast undir þrettán og sjö og setja Íslandsmet. Svo reynist maðurinn heita Evert og útibúið er ekki til.

Á baksíðu Viðskiptablaðsins er svo sagt frá því að umhverfisráðuneytið og veðurstofan hafi gert með sér árangursstjórnunarsamning. Það var aldeilis kominn tími til.
-Vef-þjóðviljinn þann 7. janúar 2006

United tekur upp Evruna eftir helgi
Ef að einhver fylgist ennþá með enska boltanum þá má geta þess Patrice Evra er búinn að semja við United og fer í læknisskoðun á mánudaginn. United er auðvitað búið að drulla hressilega í ræpuna á sér og er þrettán stigum á eftir Chelsea. Það er 1/3 af þeim stigum sem þarf til þess að verða Íslandsmeistari í boltasparki, svona alla jafna. Gamli skarfurinn fær þó alla vega prik fyrir að reyna að stoppa upp í götin en hann er nú búinn að kaupa tvo varnarmenn í janúar. Þó er sperning hvort Vidic og Evra séu póstar í að breyta einhverju. Það kemur í ljós. En það hlýtur alla vega að vera fín tilbreyting fyrir stuðningsmenn Liverpool hvað stuðningsmenn United og Arsenal hafa lítinn áhuga á enska boltanum í vetur. Ég hef þó sagt að gengi United núna minni mann á þegar maður var að byrja að styðja félagið, þar sem FA Cup var jafnan eina vonin um titil.
Passið ykkur á myrkrinu.

Munnmælasögur#38
Ég heyrði fyndna sögu um daginn. Ég man ekki hvort ég las hana í einhverjum slúðurdálkinum eða hvort einhver sagði mér hana. Ég ætla engu að síður að birta hana, þó ég hafi enga sérstaka trú á því að sögupersónan sé svona orðheppinn:

"Hannes Smárason stjórnarformaður Flugleiða mun hafa verið að ferðast til London í einni af vélum félagsins. Ku hann hafa verið undir áhrifum áfengis og látið ófriðlega, allt að því dólgslega. Þegar fluffurnar höfðu sussað nokkrum sinnum á hann án árangurs þá fóru þær að tala hvassar til hans. Mun hann þá hafa látið þennan gullmola falla: Ég á þetta - ég má þetta!"

Neytendasaga
Fór í hraðbanka hjá Kaupþingi eftir vinnu í gær. Afgreiðslan gekk eðlilega fyrir sig, en þó byrjaði peningahljóðið frekar seint. Ég tók kortið mitt en peningarnar skiluðu sér ekki, þrátt fyrir að allt hafi verið eðlilegt, eins og innistæða og leyninúmer. Ég hringdi í neyðarnúmer hjá þeim og var sagt að bíða í 5 mínútur. Ef hann myndi ekki æla þessu út úr sér þá yrði ég að fara í bankann á opnunartíma og fá féð. Meðan ég beið og horfði rannsakandi á hraðbankann, þá hvarlaði nú að mér að ég væri lentur í hrekk hjá Sveppa og krulli myndi mæta skellihlæjandi. Því var ekki að heilsa. Ég kíkti við hjá þeim í bankanum í dag og var tjáð að hraðbankinn væri tekinn í gegn tvisvar í viku. Næst yrði það á föstudaginn og þá yrði upphæðin lögð inn á kortið mitt aftur. Orðið "hraðbanki" er því eiginlega farið að taka á sig nýja mynd.
Passið ykkur á myrkrinu.

Sniðugt, sniðugt
Sniðug fluga sem mér var bent á úr einhverjum erlendum skemmtiþætti. Mátti til með að linka á þetta. Góðar tvíbökur.
Passið ykkur á myrkrinu.

Ljóðahornið Mósaíksglugginn#9
Kominn tími til að uppfæra þennan hámenningarlega dagskrárlið. Golffélagi Hlöðvers Tómassonar; Jóhannes Karl Guðjónsson, hefur átt nokkurri velgengni að fagna á sparkvöllum Engilsaxa í vetur. Ljóð dagsins er tileinkað honum og var samið af einhverri tannlausri og sköllóttri fótboltabullu úr stuðningsmannahópi Leicester City. Ætlast er til þess að textinn sé sunginn við lagið góðkunna "Seasons in the sun".

"We have joy,
we have fun,
we have Joey Gudjonsson.
He´s got style,
but no hair.
He´s angry,
we don´t care."

Passið ykkur á myrkrinu.

Sveppasamloka?
Ég hef nú hinkrað með að tilkynna lesendum spennandi samruna í skemmtanalífinu en þar sem Auðunn Blöndal er búinn að gaspra þessu á Vísi þá er mér ekkert að vandbúnaði. Skjólstæðingur minn og mentor Gunnar Samloka Sigurðsson Group er genginn til liðs við Strákana á Stöð2. Hann ætti að birtast á skjánum fljótlega en búið er að skrifa undir leikmannasamning og hann hefur æfingar með þeim í næstu viku. Líklega eru Samlokan og Sveppi með þeim fyndnari sem ég hef kynnst og það ætti að verða forvitnilegt að sjá þá saman í spaugelsi. Það er ekki hægt að segja annað en að umboðsmaður ársins sé stoltur af skjólstæðingum sínum og sérstaklega verður janúar 2006 spennandi. Strákarnir og íslensku tónlistarverðlaunin. Nú er bara næsta skref að banka upp á hjá Einar Bárðar og bjóða honum að umboðsskrifstofur okkar renni saman í eina. 50/50 að sjálfsögðu.
Passið ykkur á myrkrinu.

Áramótaannáll
Af þeim áramótaannálum sem alla jafna er boðið upp á finnst mér annáll Vef-þjóðviljans vera jafn skemmtilegastur. Nema kannski í fyrra því þá var Blogg fólksins með annál. Stundum hefur fréttaannáll Stöðvar2 verið sniðugur en því var ekki að heilsa í ár. Annáll Vef-þjóðviljans er hins vegar bæði fróðlegur og fyndinn eins og svo oft áður.
Passið ykkur á myrkrinu.